بلوچستان نا ضلع گوادر، خضدار و کیچ آن پاکستانی لشکر چھاپہ خلِسہ اِرا ایلم تون اوار چار بندغ دزگیر کننگ آن گُڈ بیگواہ کرینے۔
حوال تا رد ئٹ فہد بلوچ ہرانا سن 16 سال ءِ او کلی براہمزئی نا ہندی ئس ءِ، ئے 10 اپریل 2025 آ تینا منہ سنگت تون اوار وڈھ آن چھارو مچھی آ پکنک کن ہِننگ نا وخت آ خضدار نا ہند چمروک آن نادرست آ سلاہ بند بندغ آک اونا سنگت آتون اوار بیگواہ کریر۔
خاہوت نا کنڈ آن رسینگوک حوال تا رد ئٹ اِرا دے آن پد ایلو سنگت آتے یلہ کننگانے ولہ فہد بلوچ داسکان اوفتا دزگیر ئٹی ءِ و اونا بارَو ئٹ ہچو ڈس ئس تفسَہ۔
ایلو نیمہ غا پسنی ٹی اِستو یک بجہ غا پاکستان نا لشکر اِرا ورنا ئے زوراکی ئٹ بیگواہ کرینے۔ تومکاک حقّی ایلم ءُ ہرافتا چائند نواب ساحل ولد بابو و شہباز علی ولد بابو نا پِن ئٹ مسُنے۔ لشکر اوفتے اوفتا اُراغان دزگیر کننگ آن گُڈ بیگواہ کرینے۔
ضلع کیچ ئنا ہند تربت ئٹی پاکستان نا لشکر اسہ ورنا ئسے دزگیر کننگ آن گُڈ بیگواہ کرینے۔ ورنا نا چائند مراد بخس ولد ساکم نا پن ئٹ مسُنے ہرا تربت نا ہند آبسر نا تولک ئس ءِ اودے 31 مارچ آ قمبر ولد کریم تون اوار بیگواہ کننگا ہراڑان گُڈ او بیگواہ ءُ۔
یاتی مرے کہ ہندا تو ئٹی پاکستان نا لشکر نا کنڈ آن وے عدالت آن کھسفنگ نا تدینی تیٹی تُرندی بسُنے۔ پانک ئنا رپورٹ نا رد ئٹ مارچ ئٹی پاکستان نا لشکر 181 بندغ ئے زوراکی ئٹ بیگواہ کرینے و 13 بندغ ئے وے عدالت آن کھسفنگانے۔
