بلوچستان نا ضلع گوادر و کیچ آن اِرا بندغ نا جون خننگانو ہرافتیا بیدادی تا نشان ہم ارے۔
حوال تروکا تا رد ئٹ پسنی آن خننگوکا جون ئنا چاہنداری ببر شور پسنی نا جہی نور محمد نا مار نظام نور ئنا پن ئٹ مسنے ہرادے 13 اپریل آ بیگواہ کننگاسس۔
اینو پن کروک ورنا نا جشوک جون خننگانے۔
ایلو کنڈ آن بلیدہ ٹی ہم اسہ بندغ ئسے نا جون خننگانے ہرادے سُم خلِسہ کھسفنگانے۔
بلیدہ آن خننگوک جون ئنا چاہنداری عبدالواحد نا مار ابوبکر نا پن ئٹ مسنے ہرا بلیدہ نا جہی ئس ءِ۔
جون تے قانودی کارروائی کن اسپتال آ رادہ کننگا، ہراکان گڈ اوفتے وارث آتا حوالہ کننگا۔
