بلوچ نیشنل مووومنٹ (بی این ایم) نا بندغی حق آتیتو تفوک بشخ پانک مارچ 2025 ئٹی بلوچستان ئٹی بندغی حق آتا بھلو کچ ئسے اسکان لتاڑ تیٹی ترندی ئٹ گیشتِری ئے رپورٹ کرینے۔ ہراٹی 181 زوراکی ئٹ بیگواہ و 12 ئے بیدس عدالت کھسفنگ اوار ءِ۔
پانک ئنا توہی رپورٹ نا رد ئٹ پاکستان نا لشکر و اوفتتون تفوک ڈیتھ اسکواڈ آک بھلو کچ ئسے ئٹ بندغ آتے زوراکی ئٹ دزگیر کننگ آن پد بیگواہ کرینو ہرافتا نشانہ گیشتر خوانندہ، چاگڑدی باسک و سول سوسائٹی نا بندغ آک اسُر۔ پانک پارے کہ 87 بندغ ئے بیگواہی آن پد یلہ کننگا ہرافتے آن بھاز آتے بیدادی نا گواچی کننگاسس۔ رپورٹ ئٹی پاننگا کہ دا دزگیریک بیدس قانودی وارنٹ یا عدالت نا کاروائی آن کننگانو۔
شابیتی حوال آتے پارِسہ پانک پارے کہ شال و قلات ئٹی کھل آن زیات 37 بندغ نا دزگیریک رپورٹ مسُنو۔ ایلو زیمی مروک علاقہ غا تیٹی ڈیرہ بگٹی (18)، گوادر (15)، نوشکے (13)، ڈیرہ غازی خان (10)، کیچ (9)، بارکھان (8)، آواران (7)، کراچی (6)، سیبی (2)، لسبیلہ (5)، مستونگ (4)، پنجگور (3)، و نصیر آباد آن 2 اوار ءُ۔ ہندن رپورٹ نا رد ئٹ اسلام آباد، کچی، جعفر آباد، جیکب آباد، و خضدار آن اسہ اسہ زوراکی نا بیگواہی رپورٹ کننگانو۔
پانک پارینے کہ وے قانودی ئٹ کھسفنگوک آ بندغ آک مُست آن زوراکی ئٹ بیگواہی نا گواچی کننگاسُر۔ اوفتیٹی نظام بلوچ ہم اوار ءِ۔ ہرادے 11 مارچ آ گلی بلیدہ آن بیگواہ کننگاسس و ایلو دے اونا جون رسینگا۔ اونا ایلم شاہ نواز بلوچ ئے اوکان پد کیچ ئٹی سمکاری کرِسہ کھسفنگا۔ اسہ پین کھسفنگوک ئس شاہ جہان کرد اسّ ہرا زوراکی ئٹ بیگواہ مروک بلوچ اسٹوڈنٹس آرگنائزیشن (BSO) نا مُھبر زاہد بلوچ نا ایلم اسّ۔ اودے خضدار نا علاقہ نال ئٹی کھسفنگا۔
پین اسہ دڑدیئو تدینی ئس 21 مارچ آ اسہ پر امنو برانز ئسے نا وخت آ مونا بس۔ ہرانا مسخت زوراکی ئٹ بیگواہ کننگوک بندغ آتا آجوئی نا خواست اسّ۔ رپورٹ ئٹی پاننگا کہ 12 سالی نعمت بلوچ، حبیب بلوچ و امداد بلوچ ئے برانز نا وخت آ سمکاری کرِسہ کھسفنگا۔ پانک نعمت بلوچ نا شہیدی ئے (ریاست نا زوراکی نا پیدواری) پارے۔
23 مارچ آ احسان بلوچ ہرا بی وائی سی نا باسک و دکاندار ئس اس، ئے خضدار ئٹی کھسفنگا۔ پانک دا خون ئے (چم بازی ئٹ ٹارگٹ کلنگ) پارے۔ منہ دے آن پد 26 مارچ آ توصیف، ظہیر و ارشاد بلوچ نا جشوک آ جونک مشکے آن خننگار۔ دا مُسِٹ مہالو آن بیگواہ کننگاسُر۔ پانک گیشتر پارے کہ سیف بلوچ و انس بلوچ ہرا منہ تو مُست بیگواہ کننگاسُر اوفتا جون تے مارچ ئنا اخیر ئٹی خسنگا۔
رپورٹ ئٹی پنی آ سیاسی باسک آتا وے قانودی دزگیری نا رپورٹ آک ہم اوار ءُ، ہرافتیٹی ڈاکٹر ماہ رنگ بلوچ، بیبو بلوچ، بیبگر بلوچ و شاہ جی صبغت اللہ بلوچ اوار ءُ۔ اوفتے ایم پی او ایکٹ ئنا رد ئٹ دزگیر کرِسہ شال ئنا ہُدہ جیل ئٹی بند کننگا۔
پانک کاسی قبرستان ئٹی 13 نادرستو بندغ نا ڈھکوک کھڈ کننگ آ فریشانی نا درشانی کرے ہرافتا بارِث ئٹ خُلیس ءِ کہ او ہنوکا وخت ئٹی زوراکی نا گواچی مروک آ بندغ آتا مننگ کیرہ۔ تنظیم دا بندغ آتا کھڈ کننگ نا زوت آن زوت فورنزک پٹ ئہ پول نا خواست کرینے۔
پانک ریاست نا زوراکی ئے جہانی بندغی حق آتا قانود آتا پھاش لتاڑ پارِسہ اقوام متحدہ و جہانی بندغی حق آتا تنظیم آتے آن زوت اوار مننگ و پاکستان نا ریاست آن ورندی خواہنگ نا خواست کرے۔
