بلوچ یکجہتی کمیٹی نا بندی راہشون صبغت اللہ شاہ جی ہدہ جیل ئٹ تینا خاہوت تون اوڑدئی نا وخت پارے کہ کنے ریاست نا پارہ غان سیاسی کاریم تیان مُر مننگ نا بدل ئٹ آجوئی نا پاننگانے ولے ای داڑان نمن مسونُٹ، ای ریاستی زوراکی تا برخلاف توار بُڑز کرسا کروٹ۔
تھری ایم پی او قانود نا رد ئٹ کوئٹہ ہدہ جیل ئٹ بند بی وائی سی نا راہشون ودیک پارینے کہ ایلو بی وائی سی نا بندی راہشون تے ہم حکومت نا کنڈ آن اندا پیشکش کننگانے۔
شاہ جی پارینے کہ نن سیاسی باسک اُن ننا جہد تینا راج ئنا بنداوی حق آتیکن ءِ اگہ ریاست ئے ننا برانز دوست اف گُڑا اوفک ننا حق آتا لتاڑ ئے بند کیر۔
او مُستی پارینے کہ ریاست ننے برانز کننگ آ بیوس کیک ہرا وخت اسکان زوراکی ئٹ بیگواہی، بیدس عدالت خون و مڈی تا لٹ ئہ پُل برجاء ءِ نن چُپ مننگ کپنہ، ریاستی ادارہ غاک ننے بیدادی نا کنڈ بننگ آ بیوس کیرہ ولے نن پُر ایمن مرون اندن کہ ساندہ مسونن۔
یات مرے کہ بی وائی سی نا راہشون تیا کریک ڈاؤن نا وخت پاکستانی لشکر اندا تو ئنا اول ئٹ شاہ جی صبغت اللہ ئے دزگیر کرسا نادُرستو جاگہ ئس دریسس و منہ دے آن پد اودے تھری ایم پی او نا رد ئٹ ہدہ جیل آ دننگاسس۔
