بلوچ نیشنل موومنٹ (بی این ایم) نا ساؤتھ کوریا ہنکین نا پارہ غان درو بوسان شار ئٹی پرامن برانز ئس اڈ تننگا، ہرانا مسخت بلوچ یکجہتی کمیٹی (بی وائی سی) نا راہشون و باسک آتیا کریک ڈاؤن نا برخلاف توار بڑز کننگ اس۔
دا برانز نا مسخت ہمو بلوچ سیاسی باسک آتیا مروک بیدادی ئے پیدوار کننگ اس ہراکہ تینا بنداوی حق و شرف ئٹ زند گدریفنگ نا حق کن پرامن جہد کننگ ءُ۔
برانز نا وخت آ برانزیک کوریائی بولی ٹی تران کریر تانکہ جہی الس ئے بلوچستان ئٹی برجاء بندغی حق آتا لتاڑ نا بارو ئٹ چائندئی تننگِہ۔
برانز نا وخت آ پاکستانی ریاست نا پارہ غان بلوچ آتا توار ئے توننگ کن تاغت کاریم ئٹ ہتنگ ئے شیف خلنگا و پاکستانی ریاست نا بیدادی تا برخلاف نعرہ خلنگا۔
برانزیک خواست کریر کہ ڈاکٹر مہرنگ بلوچ، بیبو بلوچ، بیبگر بلوچ، شاہ جی بلوچ، گل زادی بلوچ تون اوار ایلو کُل دزگیر کننگوک باسک آتے زوت آجو کننگِہ ہرافتے بیدس سوب آن بندی کننگانے۔
