بلوچستان نا ضلع خاران ئٹ سلاہ بند بندغ آک لیویز تھانہ غا جلہو کرسا بھلو کچ ئسیٹی سرکاری سلاہ تے دوئی کریر، اندن کچھی ٹی سلاہ بند بندغ آک موبائل ٹاور ئس بُن تسُر۔
حوال تا رد ئٹ خاران نا علاقہ مسکان قلات ئٹی درے نن یک بجہ غا سلاہ بند بندغ آک علاقہ ٹی گشت کننگ آن گُڈ سر خاران لیویز تھانہ غا جلہو کریر و تھانہ غا کوزہ کریر۔
حوال تروکا تا رد ئٹ جلہوکارک تھانہ غان 15 آن زیات کلاشنکوف و پین مڈی درینو۔ تدینی نا حوال ئے لیویز و جہی مخلوق پک کرینو۔
ایلو کنڈ آن کچھی نا علاقہ سنی، چھتری نا ہند آ نادرست آ سلاہ بند بندغ آک اسہ "ٹیلی کمیونیکیشن کمپنی” ئسے نا موبائل ٹاور ئسے آ جلہو کرینو و کُل مشین و مڈی تے ہُشِسہ ہِس کرینو۔
دننگا جلہو تا ذمہ واری تے ساندہ بلوچ آجوئی خواہوک سلاہ بند تنظیم آک ہرفینو واہم دا تومکا جلہو تا ذمہ واری ئے دائسکان ہچو تنظیم ئس ہرفتنے۔
