گوادر نا "سینیئر صحافی جاوید ایم بی” ئے نادرست آ بندغ آتا پارہ غان کھسفنگ نا دڑکو تننگانے۔
حوال تا رد ئٹ چاگڑدی حوالکاری میڈیا غا "گوادر ءِ توار” نا پن ئٹ حوالکاری پنّو (نیوز پیج) نا ایڈمن و پنی آ صحافی جاوید ایم بی ئے درے نن نادرست آ نمبر آتیان فون کال و میسج نا ذریعت ئٹ خون ئنا دڑکو تننگانے۔
گوادر نا عین قادر پنیئو صحافی ئس چاگڑدی حوالکاری میڈیا غا میسج آتا اسکرین شاٹ آتے تالان کرینے و دا رد ئٹ شابیت حوال تے تسنے۔
او پارینے کہ جاوید ایم بی ئے اول اسہ گؤنڈو میسج ئسیٹ دڑکو تننگا ہراکان گڈ فون کال ئنا ذریعت ئٹ اودے اسہ خاص خبر ئس شنگ کننگ آ دڑکو تننگا۔
فون کروکا پھاش لوز آتیٹ اودے تینا کفن ئے تیار تخنگ نا اشارہ تس۔
جاوید ایم بی دا حوال ئے پک کرسا پارے کہ اودے بھلو وخت ئسے آن تینا صحافتی ذمہ واری تے سر تننگ نا سوب آن دباؤ تون مون تروئی تمنگ ءِ، اونا پاننگ اس کہ دا وڑ ئنا دڑکوک صحافی تا درشانی نا آجوئی آ پھاش جلہو ئسے ءُ۔
صحافی، سول سوسائٹی و شاری تپہ غاک دا تدینی آ سخت ردعمل تسنو و حکومت آن دمدستی نوٹس ہلنگ و ذمہ وار بندغ آتا برخلاف کاروائی نا خواست کرینو۔
