بلوچستان لبریشن فرنٹ نا ترجمان میجر گہرام بلوچ میڈیا غا تینا شنگ کروک بیان ئسے ٹی پارے استاد نیک محمد عرف واہگ ولد آدم کلی آواران نا جہی ئے دشمن نا جاسوسی نیٹ ورک نا دو آن 18 فروری 2022 آ شہید کننگا۔ بھاز خاص و حساس آ جیڑہ غاتا سوب آن اونا شہیدی نا حوال ئے ڈھکنگا۔
او پارے کہ شہید استاد نیک محمد عرف واہگ 2012 نا ایسری دے تیٹ بلوچ راجی آجوئی نا جنز ئٹ جہد ئے بلوچستان لبریشن فرنٹ نا تلہ آن بناء کرے و زند ئنا ایسری دم تسکان او راجی آجوئی جہد ئتون گھنڈوک مس۔
ترجمان پارے کہ نیک محمد بی ایل ایف نا تلہ غان کیہی جنگی محاذ آتیٹ اوار اس، او جیرت و دلیری ئٹ کوزئ گیر دشمن لشکر نا برخلاف جنگ کرے۔
او ودیک پارے کہ 2015 ٹی کوزہ گیر پاکستانی لشکر اوفتا اُرا تِہ ڈائنامائٹ ئٹ بلاسٹ کرِسہ تباہ کرے و اوفتا خاہوت ئے تاغت نا زور آ مہاجری نا زند ئے گدریفنگ آ بے وس کرے۔ واہم نیک محمد کُل سختی تتون مون ترِسہ راجی جنز و تنظیم تون اواری ئے برجاء تخا۔
بیان نا ایسر ئٹ پاننگا کہ بلوچستان لبریشن فرنٹ، شہید استاد نیک محمد ئے اونا قربانی تیا خیسنو دروت ندر کیک و تینا راج ئے باور ایتک کہ بلوچستان نا ہر شہید نا دتر نا بیر ئے آجو بلوچستان نا دروشم ئٹ ہلون۔
