نوشت: دیار زیب بلوچ
زرمبش براہوئی
بلوچستان ئٹی بیگواہی اسِہ ہندنو وبہا ئسے نا وڑ تالان مسنے دنکہ اسہ وبہا ئس تیوہ جہان ئے پلویڑ کے، ہندن بیگواہی تا ویل ہم تیوہ بلوچستان ئٹی بلوچ راج ئے تینا پلویڑ ئٹی ہلکونے۔
بیگواہی نا کسہ بیرہ اینو آن اف دا کسہ کیہی وخت آتیان بلوچ راج ئنا زی آ زوراکی ئٹ مننگ ءِ، بیگواہ مننگ اسہ خاہوت ںٔسے کن بھاز بھلو گڑتی ںٔس ءِ اندون کہ اینو بلوچستان نا ہر اُرا نا خاہوت تینا زند ئے بیرہ خڑینک ںٔٹ تیر کننگ ءِ ہر اُرا ٹی اسہ بیگواہو ورنا ںٔسے نا عکس اونا لمہ نا خمب ئٹی ءِ دا ظلم و بیگوہی اینو ہر بلوچ کن تِخوک ءِ ہندن کہ ہر بلوچ نا مونا مرسا ءِ۔
ہندن فہیم بلوچ و خادم بلوچ ہم پاکستانی لشکر نا دو آن بیگواہی نا گواچی مسنو۔ ہڑتُما ورناک ایف ایس سی نا خوانندہ ءُ۔ ہرافتِہ 15 مارچ آ نن ئنا 1 بجہ نا وخت کوئٹہ بورڈ آفس نا مون آن پاکستانی لشکر دزگیر کرِسہ نا درستو ہند ئسے آ درے و دائسکان اوفتا ہچو حوال اف۔
فہیم بلوچ تینا اُرا نا چراغ ءِ ہراڑان بیدس اونا اُرا تہار ءِ۔ فہیم نا باوہ معزور ءِ و اونا اُرا نا غٹ غم اونا زیہا اس و او تینا خواننگ ئے ہم برجاء تخاسس و اُرا نا ایلو سیونج تِہ ہم پورو کریکہ۔ فہیم تینا خواننگ نا بناء ئے شال آن کرے ہرا میٹرک ئسکان شال ئٹی خوانا و اوکان گڈ تینا اُرا نا سوب آن او تینا علاقہ منگچر ئٹی مستی ایف ایس سی کن داخلہ ہلک ہرا نا دسکان فرسٹ ئیر نا کلاس آک برجاء اسر۔
ہندن خادم بلوچ ہم تینا اُرا نا غٹ آن چنکا ورنا اس، خادم ہم ایف ایس سی نا خوانندہ ئس اسکہ ہرا تینا تعلیم ئے شال ئٹی برجاء تخاسس۔
دا ہڑتُما ورناک ائید نا شاپنگ کننگ کن اُرا آن پیشتمرہ کہ شال بورڈ آفس نا مون آن پاکستانی لشکر زوراکی ئٹ اوفتِہ بیگواہ کیک ہراڑان پد دائسکان اوفتا ہچو حوال اف۔
دا ہڑتُما چنک سن آ ورنا تا بیگواہی بیرہ اوفتا خاہوت آتیکن دڑد ئس اف بلکن تیوہ بلوچ راج کن اسہ دڑد ئس پاش مسنے۔
دا ہڑتُما چنک سن آ ورنا تا ڈوہ انت ءِ؟
دا ہڑتُما بیگواہ غا ورنا تا ڈوہ بیرہ اندادے کہ او بلوچ ءُ، خواننگ خوہرہ، اندہ ڈغار ںٔٹی تینا خاہوت تون اوار اسہ گیچینو زند ںٔس تیر کننگ خواہرہ، تینا سنگت آتتون اوار گپ و بشخندہ مننگ خواہرہ ولے دا زالم آ ریاست ہمو بشخندہ غاتِہ بیگواہ کیک تینا تہار آ زندان تا گواچی کیک ہراڑے ہر سہب اسہ تہارو شام ںٔس ءِ، ہراتم سہب مریک ہرا وخت شام مریک ہِچ سما اف۔ بیرہ ہمو زالم نا مون آ بے وس تولوک ہرا زالم ہمو ورنا تِہ بیگواہ کرینے تہار آ کوٹی تیٹ بند کرینے ہراڑے بندغ نہ گِڑا ںٔس خننگ کیک نئے کہ گِڑا ںٔس بِننگ کیک بس بیرہ زالم نا وڑ وڑ ئنا بیدادیک ءُ، تہاریک ءُ۔
اینو بلوچ راج ئنا زی آ فرض مریک کہ دا سوج ئے ریاست آن کننگ کن اسہ جاگہ مرے۔ انتئے کہ دا دڑد بیرہ فہیم بلوچ و خادم بلوچ نا خاہوت آتا اف دا تیوہ بلوچ راج ئنا ءِ۔ اینو اگہ فہیم و خادم بیگواہ ءُ تو پگہ راج ئنا ہر چُنا بیگواہ مرو، ہر اُرا ٹی ماتم مرو، دُنکہ اینو فہیم و خادم نا اُرا ٹی ءِ۔ اینو نن نم غٹ چپ تولوک اندا لُمہ ایڑ تا خڑینک چہیانٹ و پراد آتے اُرینہ گڑا پگہ اندا دے ننے آ ہم بریک اندن کہ دا پاکستان داسہ کننگ ءِ مُستی ہم کرو۔ ننا ورنا تِہ تینا ظلم ئنا گواچی کرو، خاہوت آ تِہ تینا ورنا تیکن وداری کرو لمہ غا تِہ زہیرئ کرو و درگہ غا تولِفنگ گڑا دا ظلم ئے ایسر کننگ کن غٹ راج ئے اسہ جاگہ مروئی تمک دا زالم نا مونا سلوںٔی تمو، تینا بیگواہ غا ورنا تیکن ہرافتِہ زالم تینا تہار آ کوٹی تیٹی بند کرینے و اُفتتون بیدادی کننگ ءِ۔ ہراتم تیوہ راج اندا ہیت ئے سرپند مس گُڑا غٹ ورناک تینا خاہوت آتون اوار زند ئے تیر کرور و لمہ غاتا اُست آن خلیس ہم پیشتمو۔ دا غٹ گڑا تیکن ننے اسہ جاگہ مروںٔی ءِ اندہ ریاست نا خلیس ئے چغل تروںٔی ءِ۔
اینو تیوہ جہان ئٹی ائید خوئشی تیٹ بندغ آک اختہ ءُ ولے بلوچ راج ئنا ہر اُرا ٹی بیگواہی نا خاخر دمال کینگہ، ہر اُرا ٹی اسہ لُمہ ئس تینا چنا کن ہُروک ءِ، اسہ ایڑ ئس تینا ایلم کن خڑینک خلنگ ءِ اسہ باوہ ئس تینا مڷ ئکن زہیری ءِ۔ اسہ چنک سن چنا ئس تینا باوہ نا عکس ئے دروت ہلِسہ پائنگ ءِ باوہ نی اَرانگ اُس ائید بیرہ ہمو خاہوت آتیکن ائید ںٔس مریک ہراڑی ہچو ایچ او خوںٔشی ںٔس مفک ہمو بیگواہ مروک آنا خاہوت ہمر خوںٔشی کیک ہراتا ورناک زالم تون او ہمو ہیڈ اولمہ غاک ہمر پوسکونو پُوچ بنیرہ ہرا تا ورناک ساما اف انت انت بے دادی تے سہنگ او بس لمہ او ہیڈ آک بیرہ تینا ورنا تا عکس آ تے ہرسہ خن تے آن خڈینک اک وَیسہ او تینا ورنا تے یات کرسہ بیگواہ آ خاہوت تا عید اندون تدیننگک ۔
