بلوچ یکجہتی کمیٹی نا راہشون ڈاکٹر ماہ رنگ بلوچ نا ایڑ نادیہ بلوچ کوئٹہ پریس کلب ئٹ پریس کانفرنس کرسا پارینے کہ غُٹ بلوچ الس ئنا سیاسی و بندغی حق آتا نمائندہ، بی بی سی، ٹائمز میگزین و نوبل امن کمیٹی کون آ جہانی ادارہ غا تا پارہ غان پن کننگوک ننا ایڑ ڈاکٹر ماہ رنگ دا وختا بے قانودی، بے آئینی بنداو آتیا جیل ئٹ بند ءِ۔ اودے جیل ئٹی تخنگ نا مسخت بلوچستان ئٹی بنداوی بندغی حق آتا لتاڑ نا برخلاف بش نروک توار تِہ توننگ نا کوشست ءِ ہرا کیہی دہک آن برجاء ءِ۔ ڈاکٹر ماہ رنگ بلوچ ڈوہدار ئس اف بلکہ او بندغی حق آتا اسہ راہشون ئس ءِ ہرانا سیاسی و بندغی حق آتا جہد ئے جہانی کہول ہم منانے و او بلوچستان نا جہانی تیبر آ نمائندگی ئے کیک ولے داڑان بیدس ہم ریاست اودے دروغ و سیاسی دباؤ آ ساڑی کیس آتیٹ جیل کرینے ہرادے نن جوانیکا پُہہ مرینہ انتئے کہ نن چُنکی آن ریاست نا دُننگا دروغ انگا کیس و بے بندغی کاریم تا گواچی مسونن۔
اوپارے کہ ڈاکٹر ماہ رنگ آن مُست ننا باوہ شہید عبدالغفار ئے ہم ریاست جتا وڑ ئنا دروغ ئنا کیس آتیٹ کیہی سال جیل ئٹ تخا، بےقانودی کیس آتیان ہراتم اودے یلہ کننگا تو ریاست اودے دوارہ زوراکی نا بیگواہی تا گواچی کرے، ریاست نا دا بے بندغی و بےقانودی کاریم تا ننے مُست آن آزموندہ ارے، ڈاکٹر ماہ رنگ تینٹ ہم چُنکی آن اندا ڈکھ آتیان گدرینگانے۔ ریاست کیہی وخت اسکان ننا خاہوت ئے ڈکھ و فریشانی ٹی تخا و آخر ننا باوہ نا جون ئے خسا و ننے بےسہارہ کرے۔ ہراتم ننا سہارہ ننے آن پُھلنگا تو ماہ رنگ ننا خاہوت کن سہارہ ئسے نا وڑ مونا بس و ذمہ واری تِہ پورو کرے۔ اودے تینٹ تینا باوہ و ننا دڑد ئنا سما اس اندا سوب آن او بلوچستان ئٹی برجاء بندغی حق، بے بندغی بیدادی، زوراکی نا بیگواہی کون آ بھلا انسانی ڈوہ تیا چُپ مننگ کتو، اندا سوب آن او سیاسی جہد ئنا ذریعت ئٹ غُٹ ایڑ ئہ لمّہ غا تا توار جوڑ مس ہرا ریاست نا زوراکی تا گواچی اسر۔ ننتو اوار او ہمو لمّہ غا تا ہم سہارہ جوڑ مس ہرافتا چُناک کیہی سال آن ریاست نا بندی جہہ تیٹ زوراکی نا بیگواہی تا گواچی ءُ، اندا سوب آن داسا ریاست نن کن اسہ وار پدا قہر ئس جوڑ مسنے۔ ماہ رنگ ئے بےقانودی و بے بندغی بنداو آتیا ہرفنگ و جیل ئٹ بند کننگ بلوچستان ئٹ برجاء بندغی حق آتا گندہ غا مثیل و ریاستی راہبند ئہ قانود نا لتاڑ نا بریبر ءِ۔
نادیہ بلوچ ودیک پارے کہ ماہ رنگ بندغی حق آتا باسک، ڈاکٹر و راجی بنیات آ اسہ مسیحا ئسے نا رد ئٹ چائنگ مریک ہرادے دا وڑ کسر تیا گِھر کرسا جیل ئٹی شاغنگانے، و داسا جیل ئٹ اوڑان بنیاتی بندغی حق آتِہ پُلنگ ءُ ہرا نن کُل کن بھلو فریشانی ئسے۔ عدالت آتا پارہ غان پاش حکم آتیان پد ہم ایجنسی تا کارندہ غاتا حکم نا ردئٹ ماہ رنگ ئے بنیاتی حق رسینگ ئٹی اف، اودے خاہوت تون ملنگ کن النگ افس، ہنوکا مُسہ دے آن نن اسہ وڑ جیل آ ہننگ اُن و کنے برانز کننگ نا دھکمی آن پد منہ سیکنڈ کن النگ مس و ایلو خاہوت نا بندغ آتِہ دا حق آن پد بِٹنگانے و جیل ئٹی اوفتون گندہ و بے بندغی روشت تخنگ ءُ ہرا بھلو فریشانی نا ہیت ئس ءِ ۔
او ودیک پارے کہ پولیس نا کنڈ آن ننے صاف ءُ اِرغ دننگ نا موکل تننگ مننگ اف ہرانا سوب آن ماہ رنگ جیل ئٹی ناجوڑ مسنے، ایجنسی تا کارندہ غا تا حکم ئٹ سیل ئنا چھار کنڈ، واشروم نا مونا کیمرہ خلنگانے، ہرا بنداوی پرائوئیسی نا برخلاف ءِ و دا کُل بیدادی تا مسخت ڈاکٹر ماہ رنگ ئے اونا بنداوی بندغی حق آتا جہد آن پد کننگ ءِ۔ نن مُست ہم کیہی وار دا ریاست نا زوراکی تا گواچی مسونن، ننا باوہ شہید عبدالغفار لانگو ئے ہم ریاست بیدادی کرسا اوڑان سیاسی جہد ئنا حق ئے پُلنگ کتو اوکان پد اودے جشوک جون ئنا دروشم ئٹ ننے واپس کننگا و داسا ریاست اندا جبر و حیوانی رویہ و اذیت ئے ننے ماہ رنگ ئے جیل ئٹ کننگ نا دروشم ئٹ تننگ ءِ ولے نن دا زوراکی تیان ہچ بے توار مروفن و ریاست ئے پانہ کہ ماہ رنگ بلوچ تون مروکا نا انصافی تا برخلاف نن سخت برانز و جہد کرون۔
اونا پاننگ اس کہ دا ہیت دے آن بار روشن ءِ کہ ماہ رنگ پین میار ئس کتنے اودے سیاسی مسخت آتا زور آتا بنیات ئٹ جیل ئٹ تخنگانے اندا سوب آن ریاست ظرف نشان ترسا اودے سیاسی قیدی نا حق آتِہ ایتِہ و ننے سختو گامگیج ہرفنگ کن بیوس کپس۔ ماہ رنگ بلوچ نا سیل ئے ڈھکوک ایجنسی تا کارندہ غاتا حوالہ کننگ نا جاگہ اوڑتون بی بندغی روشت تخنگ نا جاگہ غا آئین ئٹ ساڑی حق آتِہ تیر۔
نادیہ بلوچ پارے کہ نن نُما ذریعت ئٹ تیبہ جہان نا صحافی، بندغی حق آتا باسک، سیاستدان و غُٹ ذمہ وار بندغ آتِہ کلہو تننگ خواہنہ کہ او ماہ رنگ بلوچ تون جیل ئٹ مروک بےقانودی و بےبندغی روشت نا برخلاف توار بُڑز کیر۔ ہدہ جیل ئنا کمانڈ دا وختا پولیس نا دوٹی اف بلکہ سیکورٹی ایجنسی تا کارندہ غا تا دوٹی تننگانے ہرا ماہ رنگ بلوچ ئے سخت اذیت کننگ نا کوشست کننگ ءُ تاکہ ذہنی و فکری بنداو آ اودے نزور کننگ کیر ہرا ہچ وڑ ئٹ منکن اف اندا سوب آن ننے خُلیس ءِ کہ ریاستی ادارہ غاتا کارندہ غاک ماہ رنگ بلوچ ئے بھلو نسخان تفس۔
او ایسر ئٹ پارے کہ نن ریاست ئے پاش پاننگ خواہنہ کہ نن سیاسی و پرامن بندغ و بنداوی حق آتا باور کینہ، تاغت و بیدادی ننے اینو آن اِرا دہک مُست پرغنگ کتو و نئے داسا پرغنگ کیک اندا سوب آن آئین و قانود نا پاسداری کرسا بنداوی بندغی حق آتا شرف ئے تخسہ ماہ رنگ بلوچ ئے آجو کننگِہ۔ و بلوچ الس ئے ڈاکٹر ماہ رنگ بلوچ اندا کلہو ءِ تسنے کہ تینا سیاسی و پرامن جہد ئے ہر دروشم ئٹ برجاء تخر و بلوچستان ئٹی مروکا بےبندغی روشت نا برخلاف توار بُڑز کیر و برانز آتِہ برجاء تخر۔ دا ڈیہہ ئٹی بلوچ الس ئتو بیدس جہد آن ہچو کسر اف اندا سوب آن نزوری کپس و تینا جہد ئے برجاء تخر۔
–
