بلوچ یکجہتی کمیٹی نا راہشون ڈاکٹر ماہرنگ بلوچ نا ایڑ پارینے کہ اینو ڈاکٹر ماہرنگ بلوچ تون اوڑدہی کن ہدہ جیل کوئٹہ غا ہناٹ، بلوچستان ہائی کورٹ جیل کالخواہ تِہ پنت تسنے کہ باقاعدہ اوڑدہی نا اجازت تننگِہ۔ واہم جیل کالخواک CP NO ئٹ منظور کننگوک 25.03.2025 ہائی کورٹ نا حکم نا خلاف ورزی کرِسہ کنے مسہ گھنٹہ توریر۔
او پارے کہ ماہرنگ نا زند و جانجوڑی ئے بھاز خطرہ ءِ انتئے کہ اودے خطرناک آ ڈوہدار تتون اوار تخنگانے۔ ہراتم او مزاحمت کرے گڑا اودے یکہ بندی کننگ نا دڑکو تننگا۔
او پارے کہ نگرانی نا کیمرہ براہ راست اونا جیل سیل و واش روم نا مونا خلنگانو، و اودے 24 ساہت اسہ وڑ نگرانی ٹی تخنگانے۔ اوڑتون ذاتی معاملہ تیٹ کم رازداری اف و او پارینے کہ اونا پچ آتا گچین کننگ نا معاملہ ہم ہننگ مریک۔
او پارے کہ اودے تروک خوراک آک ساف افس و ننے خُلیس ءِ کہ اودے ہامدیکا اندنو خوراک تننگک ہرانا سوب آن ماہرنگ و بیبو ہڑتُما ناجوڑ مسنو۔ داکان بیدس ہم اوفتا علاج کننگ مننگ اف۔ اوفتون سیاسی بندی تا وڑ سلوک کننگپک و اوفتِہ بنداوی حق آتیان ہم مر تخنگانے۔
او پارے کہ دا مشکل وخت ئٹ، ای کوئٹہ نا قانودی کہول و بندغی حق آتا تنظیم آتیان خواست کیوہ کہ او ڈاکٹر ماہرنگ و بیبو نا رکھ و منصفانہ ٹرائل ئے یخینی کننگ کن زوت کاروائی کیر۔
