بلوچ یکجہتی کمیٹی نا راہشون ڈاکٹر ماہ رنگ بلوچ تون اوار تنظیم نا کیہی باسک آتا برخلاف، کوئٹہ ٹی برانز نا وختا پاکستانی لشکر نا سمکاری آن کہوکا بندغ آتا خون ئنا کیس کننگانے۔
ایف آئی آر ئٹ انسداد دہشت گردی ایکٹ تون اوار کیہی دفعہ غاک خلنگانو۔ کوئٹہ ٹی دائسکان بی وائی سی نا برخلاف مُسہ کیس کننگانے۔
پولیس نا رد ئٹ ڈاکٹر ماہ رنگ بلوچ و تنظیم نا سروک و باسک آتا برخلاف دائسکان سول لائن، بروری و سریاب پولیس تھانہ غاتیٹ مُسہ مقدمہ مسنے۔
سریاب پولیس تھانہ ٹی 22 مارچ آ مروک ایف آئی آر ئٹی ڈاکٹر ماہ رنگ بلوچ و ایلوفتیا انسداد دہشت گردی ایکٹ ئنا دفعہ ہفت و 11 ڈبلیو آن بیدس تعزیرات پاکستان نا 16 دفعہ خلنگانے۔
دا دفعہ غاک دہشت گردی، خون، خون ئنا کوشست، بندغ آتِہ بیدادی و بغاوت آ چُچلائی تننگ، فساد و نسلی منافرت تالان کننگ و ماڑی تِہ نسخان تننگ نا رد ئٹ ءُ۔
مقدمہ ٹی ماہ رنگ بلوچ و بی وائی سی نا سروک آتیا پولیس کارندہ، کَسری، لس شاری و تینا برانز کروک سنگت آتیا سمکاری کرسا مُسہ بندغ کھسفنگ و 15 پولیس کارندہ تون اوار ایلوفتِہ ٹپی کننگ نا دوبہ خلنگانے۔
مقدمہ ٹی بیبو بلوچ، گلزادی ساتکزئی، صبیحہ بلوچ، صبت اللہ بلوچ، گلزار دوست، ریاض گشکوری، ڈاکٹر شلی بلوچ و ڈاکٹر بے نظیر ئے ہم پن کننگانے۔
ماہ رنگ بلوچ و بی وائی سی نا سروک آتیا سول اسپتال آ جلہو و جعفر ایکسیرپس ٹرین آ جلہو کروک آتا جون تِہ زوراکی ئٹ دننگ نا دوبہ خلنگانے۔
کوئٹہ نا سول لائن تھانہ ٹی مروک ایف آئی آر نا رد ئٹ چھار شمبے نا نن بلوچ یکجہتی کمیٹی (بی وائی سی) نا پاننگ آ 100 آن 150 نا کچ بندغ سول اسپتال آ جلہو کریر، مڑدہ خانہ نا دروازہ ئے پِرغِسہ تہٹی پیہار و جعفر ایکسپریس ٹرین آ جلہو کروکا تا جون تِہ زوراکی ئٹ دریر۔
ایف آئی آر نا رد ئٹ پن کروک بندغ آک ہاکی چوک ئٹی اسہ پرائیویٹ ایمبولینس ئسے توریر، اونا ڈرائیور آ بیدادی کریر و جون تِہ ایمبولینس ئٹ شاغِسہ دریر۔
اوفتیا غداری، ہنگامہ آرائی، بےقانودی اشتماع، پولیس نا کاریم ئٹ ہڑاند شاغنگ، نسلی منافرت تالان کننگ، پبلک پراپرٹی ئے نسخان تننگ نا رد ئٹ تعزیرات پاکستان نا دفعہ و انسداد دہشت گردی ایکٹ ئنا دفعہ 11 ڈبلیو خلنگانے۔
داکان بیدس کوئٹہ نا پولیس تھانہ بروری ٹی ایس ایچ او محمود خروٹی نا مدعیت ئٹی بلوچ یکجہتی کمیٹی نا سروک گل زادی بلوچ، علی جان عرف پنل، شعیب، سید نور شاہ، وحید، جہانزیب، زوہیب بلوچ تون اوار سد آن زیات بندغ آتا برخلاف مقدمہ کننگانے۔
دا مقدمہ ہفتہ نا دے کوئٹہ ٹی دی کہی بائی پاس کسر ئے بند کننگ، ریاست و ریاستی ادارہ غا تا برخلاف نعرے خلنگ و الس ئنا خار ئے ودفنگ نا دوبہ ٹی کننگانے۔
ایلو کنڈ آن بلوچ یکجہتی کمیٹی دروغ انگا ایف آئی آر آتِہ شیف خلکنے و ریاستی زوراکی تا برخلاف برانز آتِہ برجاء تخنگ نا پڑو کرینے۔
