تدوکا دے تیٹ کوئٹہ نا سول اسپتال ئٹ ہتوک 23 نادرست آ جون تا چاہنداری کن بلوچستان نا کیہی بیگواہ غا بندغ آتا خاہوت آک کوئٹہ سول اسپتال نا پیشن آ جون تا چاہنداری کن مُسہ دے آن مُچ ءُ۔
اینو چھار شمبے نا دے پاکستانی لشکر اسپتال نا مونا مُچ خوہوت آتِہ بیدادی نا گواچی کرسا دانگ اینگ کننگ نا کوشست کریر۔
دا وختا کوئٹہ سول اسپتال نا پیشن کیہی بیگواہ غا بندغ آتا خاہوت آک و سیاسی و بندغی حو آتا باسک آک ساڑی اسر۔
خاہوت آک 5 جون ئنا چاہنداری ئے کرسا دوئی مسنو، و دا وختا پولیس نا کنڈ آن چُنا نیاڑی تیا بیدادی کننگا و کیہی نیاڑیک ٹپی مسر۔
کوئٹہ اسپتال ئٹ ہتنگوک جون تا بارو ئٹ کوالخواہ تا پاننگ ءِ کہ دا جونک جعفر ایکسپریس جلہو آن گڈ کلیئرنس آپریشن ئٹ خلنگوک سلاہ بند بندغ آتا ءُ، ولے خاہوت آک اوفتا چاہنداری نا خواست کننگ ءُ۔
ایلو کنڈ آن کوئٹہ نا کاسی قبرستان ئٹ پولیس و ایلو کوالخواک نن ئنا تہارمئی ٹی 13 جون ہتِسہ کھڈ کرینو۔
خیال ئٹ مرے داکان مُست ہم بلوچستان ئٹی کیہی وار زوراکی ئٹ بیگواہ کننگوک بندغ آتِہ دروغ ئنا مونتس آتیٹ کھسفِسہ اسپتال آ ہتنگانے، ہراڑے خاہوت آتِہ تینا بندغ آتا چاہنداری و جون تا دوئی مننگ آن توننگانے۔
داکان مُست ہم پاکستانی لشکر و اسپتال انتظامیہ نا کنڈ آن وار وار آ جون تا چاہنداری آن توننگ، نادرست آ قبرستان تیٹ کھڈ کننگ، خاہوت آتیان حلف نامہ تیا دستخط ہلنگ و پین اندنو تدینی مونا بسنے۔
