بلوچ لبریشن آرمی نا ترجمان جیئند بلوچ میڈیا غا شنگ کروکا تینا بیان ئٹ پارینے کہ سرمچارک کوئٹہ، تربت، ہرنائی، مستونگ، پنجگور، خضدار، نصیرآباد و جعفر آباد ئٹ دہ جتاؤ کاروائی تیٹ کوزہ گیر پاکستانی لشکر ئے آئی ای ڈی جلہو تیٹ ٹک کرینو۔ کاروائی تا وختا پولیس و لیویز نا سلاہ تِہ ہم دوئی کننگانے۔ ڈیتھ اسکواڈ نا کارندہ غاتِہ ہم ٹک کننگانے۔ دا جلہو تیٹ پاکستانی لشکر نا پنچ کارندہ مرگ ئنا گواچی و 4 ٹپی مسنو و مسہ گاڑی بھس مسنے۔
بی ایل اے نا ترجمان پارے کہ 15 مارچ ئنا نن، بی ایل اے نا سرمچارک کوئٹہ نا کرانی دے آ اے ٹی ایف نا مسہ گاڑی تیا ساڑی کاروان ٹی اوار اسہ گاڑی ئسے ریمورٹ کنٹرول آئی ای ڈی جلہو ئٹی ٹک کرینو۔ تراک ئنا دَک ئٹ برِسہ اسہ لشکری کارندہ ئس کھسک و شش ٹپی مسر۔ جلہو نا سوب آن اسہ گاڑی ئس بھس مس۔
او پارے کہ کوئٹہ ٹی اسہ پین کاروائی ئسے نا وخت آ، 14 مارچ آ جمعہ نا دے سرمچارک کیچی بیگ تھانہ آ چغلی بمب جلہو کریر۔ دا جلہو ہموتم مس ہراتم لشکری کارندہ غاک بنجائی در آن پیہنگ اسر۔ تراک نا سوب آن تھانہ ٹی سلوک اسہ گاڑی ئس ہشنگِسہ بھس مس۔
اونا پاننگ اس کہ پانزدہ مارچ آ سہب ئنا بی ایل اے نا سرمچارک تربت ئٹ ڈی بلوچ آن خڑک سی پیک روٹ آ کوزہ گیر پاکستانی لشکر نا کاروان ئٹ اوار اسہ گاڑی ئسے ریموٹ کنٹرول آئی ای ڈی جلہو ئسیٹ ٹک کریر۔ تراک نا سوب آن دژمن لشکر نا مسہ کارندہ کھسکر کم آن کم مسٹ ٹپی مسر۔ جلہو ئٹ اوفتا اسہ گاڑی ئس ہم بھس مس۔
ترجمان پارے کہ 15 مارچ آ جمعہ نا دے ہرنائی نا جہہ کوچیالی ئٹ، بی ایل اے نا سرمچارک کوزہ گیر پاکستانی لشکر نا بمب ڈسپوزل اسکواڈ نا مسہ کارندہ، ہراکہ پندھ آ اسر، ریموٹ کنٹرول آئی ای ڈی جلہو ئسیٹ ٹک کریر۔ دا جلہو ہموتم کننگا ہراتم او ریلوے ٹریک ئنا کلیئرنس ئٹی آختہ اسُر۔ تراک ئنا سوب آن اسہ کارندہ ئس ہمو جاگہ غآ مرگ ئنا گواچی مس، و اِرٹ ٹپی مسُر۔
اونا ودیک پاننگ اس کہ 16 مارچ آ ویگہ نا پنجگور نا جہہ جائین پروم ئٹی بی ایل اے نا سرمچارک کوزہ گیر پاکستانی لشکر نا اڈ تروک ڈیتھ اسکواڈ نا اسہ ٹھکانہ ئسے آ جلہو کریر۔ ہراٹی ڈیتھ اسکواڈ نا اِرا کارندہ سخت ٹپی مسُر۔
جیئند بلوچ نا پاننگ اس کہ پانزدہ مارچ آ سرمچارک جعفر آباد ئٹی اسہ پولیس چوکی ئسے آ جلہو کریر، ہراٹی لشکری کارندہ غاتِہ ٹِک کننگا، ہراٹی اسہ کارندہ ئس ٹپی مس۔
او پارے کہ 14 مارچ جمعہ نا دے بی ایل اے نا سرمچارک پنجگور ئٹی سی پیک روٹ این- 85 آ ساڑی کسٹم چیک پوسٹ آ جلہو کرسا کارندہ غاتِہ دزگیر کریر و اوفتا سلاہ تِہ ہرفیر۔ پدا کارندہ غاتِہ خبڑدار کننگ آن پد یلہ کریر۔
اندن اونا پاننگ اس کہ دوانزدہ مارچ آ سئے شمبے نا دے، بی ایل اے نا سرمچارک قلات نا ہند مہلبی ٹی لیویز پوسٹ آ جلہو کریر و کارندہ غا تا سلاہ تِہ دوئی مسر۔ پدا لیویز کارندہ غاتِہ یلہ کننگا واہم اندا وخت آ سرمچار آتا جلہو نا کوشست ئٹی اسہ کارندہ ئس ٹپی مس۔
ترجمان جیئند بلوچ نا پاننگ اس کہ 11 مارچ آ خضدار نا ہند نال، گروک ئٹی سرمچارک لیویز فورس نا چیک پوسٹ آ جلہو کریر و چیک پوسٹ آ کوزہ کریر۔ اندا وخت کارندہ غاتا سلاہ و موٹرسائیکل آتِہ دوئی مسر، پدا کارندہ غاتِہ یلہ کریر۔
بی ایل اے نا ترجمان مُستی پارے کہ 11 مارچ آ مستونگ شہر ئٹی بی ایل اے نا سرمچارک اسہ پولیس چوکی ئسے آ جلہو کرسا پنچ کارندہ دزگیر کریر و اوفتا سلاہ تِہ پُھلار، ہرافتیٹی مُسہ کلاشنکوف، اِرا پستول و پین فوجی مڈی اوار اس۔ پدا سرمچارک پولیس کارندہ غاتِہ خبڑدار کننگ آن گڈ یلہ کریر۔
ترجمان ایسر ئٹ پارے کہ بلوچ لبریشن آرمی دا کُل جلہو تا زمہ واری ئے ہرفک و آپریشن درہ بولان و نوشکی جلہو نا بابت ئٹ شابیتی درشان زوت میڈیا ٹی شنگ کننگ مرو۔
