انڈیا نا حکومت پاکستان نا دا دوبہ آن نمن مس کہ او پاکستان ئٹی آجوئی خواہوک بلوچ آتا ذریعت ئٹ "ریل ئے کوزہ کننگ” نا تازہ غا تدینی تون اوار نسلی بیدادی کون آ تدینی تیٹ تُد ءِ۔
انڈیا نا دا بیان پاکستان نا کنڈ آن دا اشارہ آن گڈ بس ہراٹی پاننگاسس کہ انڈیا بلوچستان ئٹی تخریب کاری نا کاریم تیٹ تُد ءِ۔
وزارت خارجہ نا ترجمان رندھیر جیسوال جمعہ غا تینا شنگ کروک بیان ئٹ پارے کہ ’نن پاکستان نا پارہ غان خلوکا بے بنیاد دوبہ غا تہ شیف خلینہ۔ تیبہ جہان چائک کہ جہان ئٹ دہشت گردی نا بنجاہ اراڑے کن ءِ۔ پاکستان ئے تینا تہہ ئنا ویل و بےسوبی تیکن ایلوفتیا دوبہ خلنگ نا جاگہ غا تینا زنچخ ئٹ ہُننگ نا گرچ ءِ۔‘
یات مرے کہ پاکستان نا دفتر خارجہ نا ترجمان شفقت علی خان اسہ بریفنگ ئسیٹ پاریسس کہ جعفر ایکسپریس آ جلہو نا چم بازی پیشن ڈیہہ تیٹ کننگاسس واہم او براہ راست انڈیا نا پن ئے ہلتوسس۔
واہم پدان اسہ سوج ئسے نا ورندی ٹی او انڈیا نا پن ئے ہم ہلک و بلوچستان ئٹ دننگا تدینی تیٹ تُد مننگ نا دوبہ خلک۔
او دا ہم پاریسس کہ ریل آ کوزہ نا وختا سرمچارک اوغانستان ئٹی تینا کماش تون اسہ وڑ رابطہ ٹی اسر و دا ہیت آن اوغانستان نا دفتر خارجہ نا ترجمان ہم درو تینا اسہ بیان ئسیٹ نمن مسس۔
