صدخہ ڈے نا تینا ءُ اللہ سوبس اِیسنو زیبا ءُ
شنک اس خلکونو سیخا ءُ اللہ زیبا ءُ منہ ورنا ءُ
ہرفینو قدم تے مُستی اللہ دشمن تو اریر او کسّتی
پگہ نا اریر ءُ ہستی اللہ کیرہ جُہد نا پُھل دستی
برجا موج تو نے مستی اللہ منزل تو تینا راہ راستی
آسودہ تینا فکرے کیر اللہ آجوے تینا مونی دیر
حق آ ءُ تینا شیدا ءُ اللہ زیبا ءُ منہ ورنا ءُ
زیبا چیدہ ءُ بولان نا اللہ دڈد ءُ مہر ٹی ہرمان نا
جوزہ ءُ صفا ایمان نا اللہ ہیتاتیک وطن قربان نا
رندٹ سہوگوُ جولان نا اللہ قیصہ لِکھیرہ ریحان نا
گندے خاک ٹی دارلُک نا اللہ گوے بانز تو سرکوک نا
عشقٹ مستل ءُ لیلا ءُ اللہ زیبا ءُ منہ ورنا ءُ
گوری مہر نا دیدن کو اللہ پُھلو نازبو گلشن کو
گواڑخ نا ہتم سیزن کو اللہ خرون کِڑد نا دا شن کو
سارو شوُر ٹی درشن کو اللہ بالاد چِلتنی صد من کو
بلسم نا عجب رنگا کو اللہ سُرنہ دھول تو چنگاکو
کُلان عقل ٹی بُڑزا ءُ اللہ زیبا ءُ منہ ورنا ءُ
گوگو مہر نا بالی ے اللہ کومپل ہجر نا خیالی ے
چُٹل چوٹ تو چالی ے اللہ تیر بند پوّر تو زالی ے
بُلبُل پُھل تو سیالی ے اللہ پِرک وجد ٹی شالی ے
جاتوک نود نا تالانو اللہ کافی آ پریک حیرانو
آخوب نا ننا دُنیا ءُ اللہ زیبا ءُ منہ ورنا ءُ
سوبر شون نا گِندارے اللہ لکھی بخت نا تیدارے
باریم فِکر نا سربارے اللہ گوری جی کنا دلدارے
کُرنو پوغ نا زیبدار ے اللہ شیرآک جی نُما کِردارے
لولی نا ہمو لول آ کو اللہ پینگُن چاکری قول آ کو
منزل تو تینا برجا ءُ اللہ زیبا ءُ منہ ورنا ءُ
گپاکو کنا دلبر نا اللہ گوری خزمُلی لشکر نا
وختے پاس تو دیگر نا اللہ تولوک محفل ے سنگر نا
دیدگ قیصہ ے سنجر نا اللہ بِنبو مہر ٹی دلبر نا
داستانے ہمو خرموُ تا اللہ زیبا غا کنا خزمو تا
خاچوک خل تے آ سر جا ءُ اللہ زیبا ءُ منہ ورنا ءُ
سنجر قلندرانی
