بلوچ لبریشن آرمی نا ترجمان جیئند بلوچ تینا شنگ کروک بیان ئٹ پارے کہ سرمچارک تدوکا 24 ساہت آن جعفر ایکسپریس و داٹی ساڑی بندی تیا تیبہ کنٹرول ئے برجاء تخانو۔ دشمن نا 200 آن زیات حاضر سروس فوجی، انٹیلیجنس ایجنٹ، پولیس و نیم فوجی کارندہ بی ایل اے نا کوزہ ٹی ءُ۔ دا ہمو لشکر ءِ ہرا بلوچ سرزمین آ ریاستی دہشت گردی، زوراکی نا بیگواہی، بیدس عدالت خون، و راجی مڈی تا لٹ ئہ پل ئٹ تد ءِ۔
ترجمان پارے کہ بی ایل اے جہانی جنگی قانود و بندغی حق آتہ نظر ئٹ تخِسہ پاکستانی ریاست ئے بندی تا بدل ئٹ بندی تہ یلہ کننگ کن 48 ساہت نا وخت تِسُنے ولے ریاست نا میخ تننگ، بے حسی و اسہ وڑ ہُرے کننگ نا چم دا پھاش کیک کہ پاکستان تینا فوجی کارندہ غا تا زند آتہ بچفنگ کن سوبر اف بلکہ روایتی منافقت و بے اعتنائی نا درشانی کننگ ءِ۔
او پارے کہ داسا اسہ دے ایسر مَسُنے، و کوزہ گیر ریاست تون بیرہ پین 24 ساہت ارے۔ اگہ تروک وخت ئٹ پاکستان بندی تا بدل ئٹ بندی تہ یلہ کننگ کن گھامگیج کتو تو غٹ بندی تہ بلوچ راجی عدالت ئٹ پیش کننگو۔ ہراڑے اوفتیا بلوچستان ئٹ ریاستی ظلم، نوآبادیاتی کوزہ، زنک ایسری، استحصال، و جنگی ڈوہ تیٹ تُد مننگ نا دوبہ غا مقدمہ مرو۔
او ودیک پارے کہ دا مقدمہ دمدستی، غیر جانبدار و شفاف مرو، و ڈوہ ئنا ثابت مننگ آ بلوچ راجی قانود آتا رد ئٹ ڈوہدار تہ سزا تننگو۔ پاکستان و اونا عسکری ادارہ غاک اگہ دا سرپند مریرہ کہ ہُرے کننگ نا چم وہ مصنوعی پروپیگنڈہ تیٹ حالیت ئے تینا وس ئٹ کرور گڑا دا اوفتا غلط فہمی ءِ۔ بی ایل اے تینا ہر پڑو آ تیبہ عمل کننگ کن تاغت، لائخی و عزم تخک۔
ترجمان نا پاننگ اس کہ دا گواچن پھاش مَسُنے کہ پاکستانی لشکر ئے نہ تینا کارندہ غا تا ساہ ئنا پرواہ ءِ و نئے او مذاکرات کن سوبر کوشست کننگ ءُ۔ اگہ اندا روشت مس تو تروک وخت ایسر مننگ آن گڈ ہر گدرینگوکا ساہت ئٹ پنچ بندی بلوچ راجی عدالت نا فیصلہ نا رد ئٹ سزا تننگو۔
ترجمان جیئند بلوچ ایسر ئٹ پارے کہ بی ایل اے دشمن ئے ایسری وارخواہی تننگ ءِ کہ او پروپیگنڈہ ئے الّے و زمینی گواچن تہ منّے، تینا جند ئنا جوڑ کروک بیانیہ نا جاگہ غا گواچن تون مون ایتہ و بندی تا بدل ئٹ بندی تہ یلہ کننگ کن عملی گھام ہرفِہ۔ نہ تو، بلوچ راجی مزاحمت نا فیصلہ ناقابلِ واپسی مرو و ہر پاس دشمن کن پین سخت بھرم (سنگین نتائج) ہتو۔
