بلوچستان نا ضلع مستونگ ئٹی کردگاپ نا ہند آ ہشت دے آن و پنجگور ئٹ تدوکا بیست و چھار ساہت آن زوراکی نا بیگواہی تا برخلاف تولوک برانز آک برجاء ءِ۔
مستونگ کردگاپ تولوک برانز آ اینو بلوچ یکجہتی کمیٹی نا راہشون ڈاکٹر ماہ رنگ بلوچ، بیبرگ بلوچ و ایلو سر مسر و خاہوت آتون اواری نا درشانی کریر۔
مستونگ نا علاقہ کردگاپ ئٹ برانزیک داسا ریل سروس ئے ہم تورِسہ تیبہ بند کرینو۔
کردگاپ نا ہند آ ہشت دے آن تولوک برانز برجاء ءِ ہراٹی ڈسٹرکٹ انتظامیہ نا ڈل اے ڈی سی مستونگ منان ترین تون اوار خاہوت آتون تران کن بس۔
خاہوت آک تینا غٹ بندغ آتا آجوئی، ہرافتہ پاکستانی لشکر و ڈھکوک ایجنسیک زوراکی ئٹ بیگواہ کرینو، اوفتہ پھاش کننگ و غٹ بیگواہ کننگوک بندغ آتہ دروغ ئنا مونتس آتیٹ کھسفنگ نا لڑ ئے بند کننگ نا خواست کرینو۔
خاہوت آتا ڈسٹرکٹ انتظامیہ تون مذاکرات بےسوب مس و تولوک برانز دائسکان برجاء ءِ۔
پنجگور 14 چوک سرادُک نا ہند آ وشبود نا جہی عاقل جلیل نا آجوئی کن تولوک برانز برجاء ءِ۔
بیگوہ عاقل جلیل نا خاہوت تولوک برانز ئے برجاء تخِسہ اونا آجوئی نا خواست کرینے۔
