بلوچستان نا ضلع کوہلو نا جہہ بارکھان آن پاکستانی لشکر نا دو آن زوراکی ئٹ بیگواہ کننگوک 6 بندغ نا چاہنداری مسنے۔
ہندا سال پنچ فروری آ پاکستانی لشکر بارکھان نا جہہ بالا ڈھاکہ ئٹ اُرا تیا چھاپہ نا وخت آ شش بندغ دزگیر کرِسہ نا درستو جاگہ ئسے آ درے ہراکان پد اوفتا بابت ئٹ ہچ وڑ ئنا حوال رسینگ کتنے۔
پاکستانی لشکر نا دو آن زوراکی ئٹ بیگواہ کننگوک بندغ اتا چاہنداری حاجی بنگلہ ماندانی نا مار فنکار ناڑی اسماعیل، احمد شاہ نا مار زمان شاہ، دلا ماندانی نا مار سلتو، مامند ماندانی نا مار دینمد، پتو ماندانی نا مار عیسو و پیر بخش ماندانی نا مار بانزو نا پن ئٹ مسنے۔
بلوچستان ئٹ ہندا سال زوراکی ئٹ بیگواہی تا تدینی تیٹ ودی خننگانے۔ ہنوکا اسہ ہفتہ ئٹی 50 نا کچ بندغ زوراکی ئٹ بیگواہ کننگانے ہرافتیٹ 35 بندغ ئے اسہ وخت ئٹ قلات آن بیگواہ کننگا۔
زوراکی نا بیگواہی تا تدینی تا برخلاف قلات، کردگاپ و کیچ ئٹ بنجائی دگ آ تیا برانز برجاء ءِ، سوراب ئٹ کیہی دے ان برجاء برانز ئے کالخواہ تا یخین تننگ آن پدا ایسر کننگا، اندُن کوئٹہ ٹی ہم مسہ جتاء جہہ تیا برانز تننگا۔
