بلوچ آجوئہ دوست سروک رحیم بلوچ ایڈوکیٹ چاگڑدی حوالکاری میڈیا ایکس آ شریف اللّہ عرف جعفر نا پاکستان آن دزگیری و امریکہ نا دوٹی تننگ نا زیہا تینا خیال آتا درشانی کرسا پارینے کہ شریف اللّہ عرف جعفر نا پاکستان آن دزگیری و اودے امریکہ نا دوٹی تننگ و اونا دزگیری ٹی آئی ایس آئی نا کڑد آن منہ بنیادی ہیت ثابت مریک۔
او شابیتی ئٹ پارے کہ اول تو دا ہیت ثابت مریک کہ اوغانستان یا پین ڈیہہ ئس آخہ بلکہ داسا بی پاکستان ہی خطہ ٹی مذہبی شدت پسند و انتہا پسند تنظیم و دھر تیکن اسہ بھلو سرپرست، رکھوک پناہ گاہ و بہشت ئس ءِ۔
او پارے کہ ارٹمیکو دا کہ مذہبی انتہا پسندی و شدت پسندی نا تالان کننگ پاکستان نا تہہ و ڈنی پالیسی تیٹ داسا ہم اسہ کلیدی عنصر ئس ءِ۔
رحیم بلوچ اندن پارے کہ مسٹمیکو دا ہیت پھاش مریک کہ پاکستان مذہبی انتہاپسندی و شدت پسندی و دا نا فکر تون تفوک عنصر تا سرپرستی ئے کرسا اوفتہ ہمسایہ قوم و ڈیہہ تیا دباؤ شاغنگ کن اسہ آلہ پالیسی ئسے نا وڑ کاریم ئٹ ہتیک۔
او ایسر ئٹ پارے کہ چھارمیکو دا ہیت پھاش مریک کہ امریکہ نا پاننگ آ شریف اللّہ عرف جعفر نا دزگیری و اودے امریکہ نا دوٹی تننگ، پاکستان مذہبی شدت پسند عنصر تا سرپرستی ئے کرسا تینا ڈنی تعلقداری تیٹ اسہ لیوریج leverage ئسے نا وڑ کاریم ئٹ ہتنگ نا پالیسی آ دائسکان سلوک ءِ۔
