بلوچستان ئٹی زوراکی نا بیگواہی تا لڑ برجاء، جتا علاقہ تیان پاکستانی لشکر نا دو آن نُہہ بندغ بیگواہ، اندن مُسٹ آجو مسنو۔
حوال تا رد ئٹ 4 مارچ 2025 آ بلوچستان نا علاقے مشکے رونجھان آن پاکستانی لشکر بجار نا مار لیاقت و حسن نا مار بختیار ئے دزگیر کننگ آن گڈ بیگواہ کرینے۔
اندن مشکے آن اسہ پین حوال ئسے نا رد ئٹ پاکستانی لشکر واحد بلوچ نا مار ارشاد ئے 27 فروری آ بیگواہ کرینے ہرا اسہ لیویز کارندہ ئس ءِ۔
ایلو کنڈ آن پنجگور آن برکت نا مار شے مزار ئے زوراکی ئٹ بیگواہ کننگانے ہرا تسپ پنجگور نا جہی ئس ءِ۔
خاہوت بندغی حق آتا تنظیم آتیان اونا دمدستی آجوئی کن گھام ہرفنگ نا خواست کرینے۔
اندا وڑ 19 فروری آ ملیر کوہی گوٹھ نا علاقہ آن پاکستانی لشکر ولید ولد عطاء محمد و زوہیب ولد زباد ئے زوراکی ئٹ بیگواہ کرینے۔
اندن کیچ ئنا بنجائی شار تربت آن حوال رسینگانے کہ اسہ بندغ ئس پاکستانی لشکر نا دو آن زوراکی ئٹ بیگواہ کننگانے۔
خاہوت نا رد ئٹ درے نن پاکستانی لشکر نا بھلو کچ ئس تربت یونیورسٹی نا خڑکا چائیں کور علاقہ ٹی چھاپہ خلِسہ تاپلو تاگ زامران نا جہی نعیم کریم نا مار قریش ئے اونا اُراغان زوراکی ئٹ بیگواہ کرینے۔
ایلو کنڈ آن دریابی شار گوادر آن سیکیورٹی لشکر چھاپہ خلِسہ فقیر کالونی آن میران نا مار قاسم یے اونا اُراغان زوراکی ئٹ بیگواہ کرینے اندن ڈور گوادر آ علی جان نا مار عارف ئے ہم زوراکی ئٹ بیگواہ کننگانے۔
کوئٹہ، کلی کمالو سریاب آن 2 اکتوبر 2024 آ پاکستانی لشکر نا دو آن زوراکی ئٹ بیگواہ کننگوک ورنا مزمل مری پنچ تو آن پد آجو مرسا تیا اُرا ئے سر مسُنے۔
اندن تربت آن زوراکی ئٹ بیگواہ کننگوک زمان بلوچ و ابولحسین بلوچ ئے 4 مارچ آ پاکستانی لشکر نا دو آن بیگواہی آن گڈ آجو کننگانے۔
