نوشت: مبشر بلوچ
براہوئی مٹ: نزہت بلوچ
کتاب خواننگ است ئے جارات تننگ نا اسہ مشغلہ، علم و شعور ئٹ ودکی نا سوب بلکن زہنی تخیل نا بال ہنداٹی ء۔ پوسکنا جہان تا سیل آن ہلیس پوسکنا خیال آتون روشناس مننگ اسکان، زند ئے پہہ مننگ آن ہلیس آسمان ئے تسخیر کننگ اسکان کل کتاب آ تیٹ ڈھکوک اریر۔ صبر نا کڑمبی آن ہلیس سوچنگ نا لائخی اسکان، علم ئنا ذخائر تیان ہلیس تہذیت، دود ربیدہ و زمانہ تون تفوک مننگ اسکان غٹ کن اندا کتاب آتا سہارا ہلوئی تمک۔
کتاب آتا شیدائی سنگت سفر خان نا موبائل نا پی ڈی ایف آتیٹ تنظیمی لٹریچر آن ہلیس شاعری، تاریخ، فلسفہ، سیاست جنگ و ایلو علمی سرحال تیا کیہی کتاب ساڑی اسک۔
تینا فارغ وخت ئٹ او گیشتر موبائل پی ڈی ایف ئٹ خواننگ ئٹ آختہ مسکہ، ای اونا خواننگ نا عمل نا کیہی وار مشاہدہ کریسٹ۔ ہرا علاقہ ٹی ننا کیمپ اسک اوڑے درخت آک گنج اسر۔ باسنی نا مرغنا دیک اسر۔ بیگہ نا ارغ آن پد کل سنگت آک فارغ مسرہ گڑا زرس وخت کن ہر کس اسہ درخت ئسے نا شیفا تینا جاگہ آ آرام کننگ کن ہناکہ، گڑا ای و سنگت سفر خان ہم بش مسنہ تینا جاگہ غا ہنانہ۔ اتفاق ئٹ اونا آرام کروکا جاگہ کنا خاچوک جاگہ آن مسہ چھار گام مونشیفی اسہ درخت ئسے نا شیفا اسک۔ دا نیامٹ ای ہراتم اونا آرام کروک جاگہ نا پارہ غا ہراٹہ بھاز وخت اودے موبائل آ گڑاس نہ گڑاس خواننگ ٹی آختہ خناٹہ۔ وختس ای شام ئنا ہرے آ سماء کریٹہ پی ڈی ایف آن کتاب ئس یا آرٹیکل ئس خواناٹہ یا فلم ئس ہراٹہ ہمر کاٹم بڑز کریٹہ اونا پارہ غا ہراٹہ او لیٹوک تینا موبائل آ چُپی ئٹ گڑاس ہراکہ و اونا معمول نا خواننگ نا عادت و ذوق ئے خنسہ اندازہ مسکہ کہ او الم کتاب ئس خواننگ ءِ۔
ہراتم کنے وار رسینگاکہ، یا ای سنگت سفر خان ئے فارغ خناٹہ گڑا گڑاس ہیل کننگ نا بہانہ غا اونا رہیا ہناٹہ توسٹہ، و جتاء سرحال تیا ہیت کننگ نا کوشست کریٹہ۔ او تینا بھاز آ مطالعہ، غور و فکر و تحریکی مسئلہ و معاملہ غاتہ خوڑتی ئٹ ہُننگ نا سوب آن ہر وڑ ئنا سرحال تیا نہ بیرہ چائند تخاکہ بلکن اونا علمی انداز ئٹ تبصرہ کننگ نا وخت آ زیر بحث سرحال آ تیوہ گرفت تخاکہ۔ و اونا ہر پہلو ئے بھاز نرم انداز ئٹ زیر بحث ہیسکہ۔ دا بحث آتا وخت ہراتم ای اوڑان سوج کریٹہ او کنا ہر سوج ئنا اطمینان ئٹ ورندی تسکہ و ای اونا دا علمی لائخی نا مدام ستا ئے کروٹ۔ سفر خان نا سنگتی ٹی ہخس وخت مسُنٹ کنا خواہش و کوشست تومکا ہندا مسنو ہخس منکن مرے سنگت نا رہان گڑاس ہیل کیو۔
مطالعہ نا وڑ سنگت سفر خان ئے شاعری تون ہم دلچسپی اسک۔ ایلو کتاب آتا وڑ اونا موبائل پی ڈی ایف ئٹ بلوچ شاعر آتا کیہی کتاب آک اسر ہرافتیٹ رزمیہ، نظم و شعر تہ کڑمبی تون خوانِسہ درشان کریکہ ہراڑان اونا شاعری نا زوق ئنا سماء تماکہ۔ بھاز وخت شام ئنا وخت کیمپ ئٹ ہرا جاگہ ئے ارغ کننگ کن گچین کننگاسس ہموڑے او چلہہ ٹی لگوکا خاخر نا دارہ ایرہ تولِسہ سنگت آک شاعری نا محفل خلکُرہ، و دا شاعری نا محفل بھاز وخت اونا پاننگ آ لگاکہ۔ شاعری نا محفل ئٹی ہراتم سنگت آک تینا است پسند آ شعر تہ درشان کننگ نا وخت آ ایلو سنگت آ تیان ” واہ واہ” و” بھاز جوان ” نا وڑو داد ہلکرہ۔ ہموتم ہندا ماحول جوڑ مسکہ کے ہراڑان محسوس مسکہ کہ گواچن ئٹ دا شاعر تا بزم ئس ءِ۔ ہراڑسکان کنے یاد بریک سنگت سفر خان جتاء شعر، رزمیہ و نظم درشان کننگ تون اوار گیشتر مجلس تیٹ بلوچ شاعر ابصار بلوچ نا اسہ شاعری ئس ہرا فدائی گودی سمعیہ بلوچ کن ءِ، درشان کریکہ۔
کیمپ ئٹی ننتون اسہ فٹبال ئس اسک خبر اف اَرا سنگت ہیسس تہ, بیگہ نا ہراتم دے مچہ مسکہ گڑا سنگت سفر خان فٹبال ئے بغل ئٹ خلوک اوتاخ ئٹ ساڑی سنگت آتہ توار کریکہ کہ "ببو بئی فٹبال نا ورزش ئس کین” کیمپ ئٹ ٹریننگ کن گچین کروکا جاگہ غا سنگت آک مچ مسرہ و گوازی کریرہ۔ او ہرا وخت اسکان شار ئٹ ساڑی اسک فٹبال گوازی کرِسہ تینا شونق ئنا تشفی کریکہ اوکان پدا ہراتم شار آن مشی محاذ آ بس ہموتم ہم فٹبال نا زوق و گوازی آن کنارہ کش کننگ کتو۔ سنگت سفر خان ہراتم کیمپ ئٹ ساڑی مسکہ گڑا شغل و گوازی نا اسہ گچینو ماحول ئس الم جوڑ مسکہ۔
سنگت سفر خان گواچنیکا بلوچ گلزمین نا گواچن آ ملْ اس ہرا بلوچ گلزمین نا آزاتی و راجی پجار کن جہد ئٹ دلیری ئٹ تینا راجی زمہ واری تہ سر ترسا رخصت مس۔ ہنِسہ او ننا وڑ پدی رہینگوک آ تیکن تینا راہ عمل ئے الا۔ و او دا کسر آ تینا دتر آن اسہ چراغ ئس خلک ہنا تانکہ دا کسر آ بروکا تا ارزانی کن تینا رژن تالان کرِسہ کے۔
