بندغی حق آتیکن کاریم کروک بلوچ راہشون ڈاکٹر ماہ رنگ بلوچ نوبل امن داد ئکن پِن کننگا، دا داد ئکن تیبہ جہان آن 338 بندغ و ادارہ پِن کننگانو ہرافتیٹ 244 بندغ و 94 ادارہ اوار ءُ۔
بلوچ صحافی کیّا بلوچ نا ردئٹ ڈاکٹر ماہ رنگ بلوچ ئے بلوچستان ئٹ برجاء بندغی حق آتا لتاڑ نا برخلاف گچین وڑ ئٹ جہد ئنا سوب آن پِن کننگانے۔
یات مرے ڈاکٹر ماہ رنگ بلوچ، بلوچ یکجہتی کمیٹی نا سروکی ئے کرسہ، بلوچ قوم ئنا حق آتیکن و زوراکی نا بیگواہی تا برخلاف توار بڑز کننگ ءِ۔
اونا سروکی ٹی کیہی برانز و لانگ مارچ آک اڈ تننگانو، ہرافک جہانی تلہ غا بلوچ الس ئنا ویل آتہ پھاش کرینو۔
داڑان مُست اودے بی بی سی جہان نا سد زہم تخوک زالبول آتیٹ اوار کرے و جہانی میگزین ٹائمز نا پارہ غان 100 پوسکن مونی بروک راہشون تا دروشم ئٹ منّنگاسس، ہراڑے پدان اودے نیویارک ئٹ ٹائمز میگزین نا مجلس ئٹ اوار مننگ کن ہِننگ وخت آ کراچی ایئرپورٹ آ پاکستانی کوالخواک توریسر۔
