بلوچستان ئٹی زوراکی نا بیگواہی تا برخلاف مرغنا بین برانزی گدان ئے اینو 5750 دے مس۔
بی ایس او پجار نا وائس چیئرمین ڈاکٹر طارق بلوچ، ایم جے بلوچ و نیشنل پارٹی نا صوبائی جنرل سیکریٹری چنگیز حئی بلوچ گدان آ بسر و زوراکی ئٹ بیگواہ کننگوک بندغ آتا خاہوت آتون اواری نا درشانی کریر۔
گدان آ بروکاتتون وی بی ایم پی نا وائس چیئرمین ماما قدیر بلوچ تران کرسہ پارے کہ زوراکی نا بیگواہیک، جشوک جونک، سیاسی جہدکار و خوانندہ غاتا خلّنگ و مخلوق آ فوج ئنا زوراکی مدام کوزہ گیر ریاست آتا سِلا مسنے، ہمرکہ بلوچ راجی جہد ویل آتان گدرینگسہ پین مُستی ہنا تو پاکستانی ریاست زوراکی ٹی بھاز مونی بس ہرا اینو اسکان برجاء ء۔
وی بی ایم پی نا پاننگ ء کہ سال اِرا ہزار آن اینو اسکان ہشتاد ہزار بلوچ ورنا زور ئٹ بیگواہ کننگانے، ہندن بیست ہزار ئس بندغ ئے بند کرسہ کھسفنگانے۔ دا بیگواہ غا بندغاتا آجوئی کن دافتا خاہوت آک ہنوکا شانزدہ سال ئٹی جمہوری حساب آ و امن ئٹ جہد کرینو ہرافتیٹ برانزی مظاہرہ، ریلی، دیوان، عدالت نا پیشی و مرغنا بین ہڑتال آک اوار ءُ۔
ماما قدیر بلوچ نا پاننگ اس کہ بلوچ خاہوت آک ظلم و زوراکی و بندغی حق آتا لتاڑنگ ئے دنیا نا مون آ ہتنگ کن تاریخ ئس الّانو، زور ئٹ بیگواہ کننگوک بندغ آتا آجوئی کن نن ہر وڑ ئنا خطرہ و ریاستی بیہار ئے پدبٹسہ تینا جہد ئے برجاء تخانن ولے افسوس ء کہ دنیا اسہ غلامو راج ئسے نا جہد ئے اسہ رنگ نظر ئٹی ہتنگ ئٹی اف۔
