پنی آ بلوچ صحافی کیّا بلوچ ئے PEN ناروے نا Imprisoned Writers Committee و Young Writers Committee نا باسک گچین کننگا۔
کیّا بلوچ بلوچ داسا PEN ناروے نا نمائندگی ئے کرسا PEN انٹرنیشنل تون اوار کاریم کرو تاکہ تیبہ دنیا ٹی ورنا غا نوشتکار آتہ ‘درشانی نا آجوئی’ نا وارخواہی رسینگِہ۔
ورنا نوشتکار آتا کمیٹی نا مسخت پوسکن نوشتہ نا کنڈ آ بروک نوشتکار آتہ مون ہلوک چیلنج آتون مون تننگ ئت کمک کننگ و اوفتیکن اسہ سوگو تلہ (پلیٹ فارم) ئس تننگ مرے۔
داکان بیدس کیّا بلوچ Imprisoned Writers Committee نا رد ئٹ بندی آ نوشتکار و صحافی تیکن کاریم کرو ہراٹی خاص وڑ ئٹ ایران، انڈیا و بیلاروس ئٹ قید نوشتکار آتا حق کن مہم چلفنگو۔
یات مرے کہ PEN اسہ جہانی تنظیم ئس ءِ ہرا تیبہ جہان ئٹ ادیب، صحافی و دانشور آتا حق ئنا رکھ کن کاریم کیک۔
دا تنظیم درشانی نا آجوئی (آزادیٔ اظہار)، ادبی کاریم تا واپار و نوشتکار آتا حق کن کاریم کیک۔ PEN انٹرنیشنل جتا ڈیہہ تیٹ ظلم و زوراکی تا گواچی نوشتکار و صحافی تیکن توار بڑز کیک و بندی آ نوشتکار آتا آجوئی کن مہم چلفک۔
داکان بیدس دا درشانی نا آجوئی آ سنسرشپ نا برخلاف ہم کاریم کیک۔
اندن تنظیم نوجوان نوشتکار آتا است بڈی ئے کیک و اوفتیکن پلیٹ فارم ایتک ہراڑے او تینا تخلیقی لائخی تہ مونا ہتنگ کیر۔
