پاکستانی لشکر نا دو آن زوراکی ئٹ بیگواہ کننگوک یاسر بلوچ نا خاہوت ملیر نیشنل ہائی وے آ برانز کننگ ءِ و خاہوت نا پاننگ ءِ کہ ایسکان یاسر بلوچ ئے یلہ کتنو نن روڈ ئے بند کرسہ تینا برانز ئے برجاء تخون۔
برانز ئٹ بی وائی سی نا سروک ڈاکٹر صبیحہ بلوچ ہم اوار مس۔
یات مرے کراچی ملیر نا جہی خوانندہ یاسر بلوچ 24 و 25 فروری 2024 نا نن گلشن اقبال ئٹ تینا سنگت آتون اوڑدئی کن ہناسس و 10:30 نا وختا تینا اُراغا واپس ہننگ اس کہ کسر آن ریاستی ڈھکوک ایجنسی تا دو آن بیگواہی نا گواچی مس۔
پاننگک کہ جمعہ گوٹھ ملیر کراچی نا جہی یاسر علی ولد سبزل علی بینظیر بھٹو یونیورسٹی آن میڈیا سائنس خوانانے۔
