بلوچستان ئٹی زوراکی نا بیگواہی تا برخلاف بھلو کچ ئسیٹی جتا علاقہ تیٹ برانز آک برجاء ءُ۔
بلوچ یکجہتی کمیٹی جھالاوان ہنکین و زیمی مروک خاہوت اتا برانز سوراب سی پیک روڈ آ ارٹمیکو دے برجاء سلیس، اِرا وار ڈپٹی کمشنر سوراب تون گپ تران بےسوب مس۔
سوراب ئٹ زوراکی ئٹ بیگواہ کننگوک نُہہ بندغ نا خاہوت آک برانز کننگ ءُ۔
بیگواہ کننگوک آتیٹ مجیب الرحمٰن ولد محمد انور، 9 جنوری 2025 آ نن ئنا 7 بجہ غا زہری آن بیگواہ کننگانے۔ عتیق الرحمن ولد عبد القادر، 13 جنوری 2025 آ دے ئنا 2 بجہ غا ملگزار خضدار آن بیگواہ کننگانے۔ محمد حیات ولد محمد عمر، ہرا 18 فروری 2025 آ دے ئنا 2 بجہ غا زہری ڈاک آن بیگواہ کننگا۔
حافظ سراج احمد ولد دین محمد نورگامہ زہری آن، زاہد احمد ولد عبد الحمید 10 اکتوبر 2022 آ سردار دودا خان اسٹیڈیم زہری آن بیگواہ کننگانے۔
اندن یاسر احمد ولد گل محمد، ہرا 5 جون 2023 آ بلبل زہری آن بیگواہ کننگانے۔ زکریا ولد سعد اللّٰه، ہرا 30 اگست 2021 آ پنجگور آن بیگواہ کننگا۔ احمد ولد عبد رشید ئے 29 اپریل 2023 آ ویگن آن دھڑفِسہ پیر عمر، ضلع خضدار آن بیگواہ کننگانے۔ محمد شفیق ولد محمد حیات، ہرا 31 اگست 2022 آ گدان ہوٹل زہری آن بیگواہ کننگا۔
خاہوت آک تینا بندغ آتا آجوئی اسکان بلوچ یکجہتی کمیٹی جھالاوان ریجن تون اوار برانز ئے برجاء تخنگ نا پڑو کرینو۔
ایلو کنڈ آن تربت ئٹ زوراکی نا بیگواہی تا برخلاف خاہوت آک اسہ وار پدا، ہفتہ ئسے آن جدگال ڈن آ کسر ئے بند کرسا برانز کننگ ءُ۔
بہمن آن بیگواہ کننگوک نعمان رفیق، اسماعیل خیر محمد و نعیم بشیر نا خاہوت آک جدگال ڈن(ڈی بلوچ پوائنٹ) آ ایم 8 کسر ئے بند کرینو۔
خاہوت میڈیا تون تران کرسا پارے کہ اوفتا بندغ آتہ بہمن آن بیگواہ کننگانے و اوفتا آجوئی کن داکان مست ہم جتا وخت آتیٹ برانز کرینن و انتظامیہ ننے اوفتا آجوئی نا باور تس ولے اوفتہ آجو کننگتو۔
او پاریر کہ داسا نن بیوس مرسا دوارہ برانز کننگ اُن۔
یات مرے کہ بہمن آن اسہ نن ئٹ 6 بندغ زوراکی ئٹ بیگواہ کننگاسس ہرافتان مسٹ آجو مسنو و نعمان رفیق، اسماعیل خیر محمد و نعیم بشیر دائسکان بیگواہ ءُ۔ اوفتا خاہوت اوفتا آجوئی نا خواست کرینے۔
اندن زوراکی ئٹ بیگواہ کننگوک بہادر علی کھیازئی، علی رضا کھیازئی و بشیر احمد کھیازئی نا خاہوت اوفتا آجوئی کن کوئٹہ نا جتا علاقہ، گولیمار چوک، کسٹم سریاب و بروری بائی پاس آ تولوک برانز کننگ ءِ۔
اندن حب بھوانی ٹی اینو مسٹمیکو دے ہم برانز برجاء سلیس و درے نن انتظامیہ تون گپ تران بےسوب مس۔
دا وختا برانز جہہ آ یاسر حمید، جنید حمید، نصیر جان، ندیم بلوچ، احسان بلوچ، امین بگٹی بلوچ نا خاہوت آک تولوک برانز کننگ ءُ و تینا بندغ آتا سرسلامت آجوئی نا خواست کننگ ءُ۔
مستونگ نا علاقہ کردگاپ ئٹی ہم زوراکی ئٹ بیگواہ کننگوک بندغ آتا خاہوت آک بنجائی دگ ئے بند کرسا برانز کننگ ءُ۔
برانزی تیٹ جاوید سرپرہ, زاکر سرپرہ راشد سرپرہ و ایلوفتا خاہوت آک اوار ءُ۔
پسنی ٹی برانز آن گڈ پنچ بندغ آجو مسنو ہرافتیٹ احمد رضا آصف اللہ بخش، فیصل صوالی، ساجد صوالی و محمد رضا ولد رزاق اوار ءُ۔
خیال ئٹ مرے پن کروک بندغ آتا آجوئی کن پنچ شمبے نا دے خاہوت آک تولوک برانز کرسا پسنی زیرو پوائنٹ نا ہند آ مکران کوسٹل ہائی وے ئے ہر وڑ ئنا ہن ئہ بر کن بند کریسُر۔
