توتک نا سرزمین اسہ وار پدا زوراک آ تاغت آتا زوراکی تتون مون تننگ ءِ، ولے قبائلی غیرت و حمیت نا حامل سردار و الس ہچ وڑ ئٹ دادے منیپک۔ قبائلی سروک آک
درو توتک ئٹی اسہ بھلو جرگہ ئس اڈ تننگا ہراٹی جتا قبیلہ غا تا سروک آک اوار مسُر۔ دا جرگہ پنی آ قبائلی رہشون سردار علی محمد قلندرانی نا بھلنی ٹی بٹنگفنگا، ہراٹی خان قلات نا مار پرنس محمد احمدزیی تون اوار ایلو قبیلہ غا تا سردارک اوار مسُر۔ جرگہ ٹی ہند ئنا بدنام زمانہ ڈیتھ اسکواڈ نا جہی مننگ، زوراکی ئٹ بیگواہی و امن و ایمنی نا حالیت آ تران کننگا۔
قبیلہ غا تا سروک آک اوڑدئی ئٹ مُسہ قرارداد منار کہ بلوچستان ئٹی زوراکی ئٹ بیگواہ کننگوک بندغ آتہ زوت آجو کننگہ۔ توتک آن ڈیتھ اسکواڈ ئے زوت کشنگ مرے نہ تو السی ردعمل سختی ئٹ مونا برو۔
مجلس ئٹ پاننگا کہ اگہ حکومت دا خواست آتہ ہتو گُڑا بلوچستان ئٹی کسر تہ بند کننگ مرو۔
سردار علی محمد قلندرانی جرگہ ٹی ہیت کرسا پارے کہ ننا ضمیر مطمئن ءِ، ننا دوک بے گناہ تا دتر تیٹ غرک افس، نن ہچو ڈوہ ئس کتنن، ولے دا پاننگ خواہنہ کہ نن دا زوراکی تا مونا دیوار مرون۔
اوفک مُستی پاریر کہ ننے ہنوکا 15 سال آن سخت انگا زوراکی تتون مون تروئی تمنگ ءِ ولے داسا نن پین زوراکی برداشت کپرون۔ اگہ ریاست دا زوراکی تا نوٹس ہلپک گُڑا الس تینا رکھ و امن نا تینٹ فیصلہ کرو۔ نن ہچ وڑ ئٹ شفیق مینگل نا وڑ ءُ قاتل ئسے دوارہ توتک نا زمین آ کوزہ کن الیپرون۔
سیاسی و چاگڑدی مخلوق نا پاننگ ءِ کہ ریاست اگہ دا خراب انگا حالیت آ بے توار مس گُڑا حالیت آک بھاز خراب مرور۔ السی رد عمل ئے ہرسہ اندا امیت مننگ ءِ کہ زوت سرکاری تیبر آ بھلو فیصلہ ئس مونی برو، نہ تو تحریک پین ترند مرو۔
