حوال تا رد ئٹ بلوچستان نا ضلع خضدار نا تحصیل زہری آن پاکستانی لشکر نا دو آن زوراکی ئٹ بیگواہ کننگوک نُہہ بندغ نا خاہوت آک اوڑدئی ئٹ 28 فروری آ کوئٹہ کراچی بنجائی کسر آ جتا جاگہ غا تیا برانز کرسا کسر ئے بند کننگ نا پڑو کرینو۔
دا رد ئٹ زوراکی ئٹ بیگواہ کننگوک بندغ آتا خاہوت آک بلوچ یکجہتی کمیٹی آن خواست کرینو کہ اوفک برانز و برانز ئٹی اوفتون اوار مریر۔
یات مرے کہ پاکستانی لشکر و ڈکھکوک ادارہ غاک ہنوکا تو جنوری ٹی زہری نا جتا ہند آتیان کیہی بندغ آتے دزگیر کرسا تینتون دریسُر ہرافتیان اسٹ ئس آجو مسنے، واہم کیہیک دائسکان نہ پھاش کننگانو نہ آجو مسنو۔
پن کروکا بندغ آتیٹی مجیب الرحمن بوبک ولد نور محمد انور 09 جنوری، عتیق الرحمن بوبک ولد عبدالقادر 13 جنوری ملگزار خضدار، محمد حیات مٹازئی ولد محمد عمر 18 فروری زہری ڈاک رحیم آباد، حافظ سراج احمد پندرانی ولد دین محمد نورگامہ زہری، ذاہد احمد ولد عبدالحمید موسیانی 10 اکتوبر 2022 سردار دودا خان اسٹڈیم زہری، یاسر احمد ولد گل محمد موسیانی 05 جون 2023 بلبل زہری، زکریا ولد سعد اللہ 30 اگست 2021 پنجگور، نوید احمد ولد عبدالرشید موسیانی 29 اپریل 2023 پیر عمر خضدار نا جہہ آن ویگن آن شیف کننگاسس، محمد شفیق ولد محمد حیات 31 اگست 2022 گدان ہوٹل زہری آن زوراکی ئٹ بیگواہ کننگاسس۔
بیگواہ کننگوک بندغ آتا خاہوت آتا پاننگ ءِ کہ اگہ اوفتا بندغ آتے 27 فروری اسکان آجو کننگ متو گُڑا اوفک 28 فروری آ بنجائی کسر ئے جتا ہند آتیا بند کرور و برانزی تحریک ئے شابیت ایتور۔
خاہوت آک بندغی حق آتا تنظیم و بلوچ یکجہتی کمیٹی آن خواست کرینو کہ اوفک برانز ئٹی اوار مرسا زوراکی نا بیگواہی تا برخلاف توار بُڑز کیر۔
