زرمبش فیچر رپورٹ
نوشت: گندار بلوچ
"کنا لمہ زہنی ناجوڑی تیان بیدس است ئنا ہم مریض مسنے۔ سلمان نا بیگواہی آن گڈ کنا لمہ باوہ تینے تنیا محسوس کیرہ، ہراتم اوار تولرہ گڑا سلمان نا چنکی، اونا زیبائی، اونا ورنائی ئے یات کرسہ خڑینک شولرہ کہ ننا چنک سن آ مار بیدس ڈوہ آن ظالم تا ٹاچر سیل تیٹ بند ءِ و داخس وخت آن پد ہم آجو کننگپک۔ سما اف او انت حالیت ئٹ مرو۔” دا پاننگ ءِ بیگواہ کننگوک سلمان بلوچ نا ایڑ سعدیہ بلوچ نا ہرا تینا شیرزال آ لمہ تون اوار جتا برانز آتیٹ تینا ایلم کن توار بڑز کننگ آ خننگ مریک۔
سعدیہ بلوچ نا پاننگ ءِ کہ اونا ایلم نا بیگواہی اوفتا خاہوت ئے پرغانے، او سلمان نا زند و اونا سرسلامت آجوئی نا بارو ئٹ اسہ وے ایسر مروکو فریشانی و خلیس ئسے نا گواچی ءُ۔
سلمان بلوچ نا خاہوت ہم بلوچستان نا ہمو ہزار آ خاہوت آتیان اسٹ ءِ ہرا زوراکی نا بیگواہی تا ویل ئنا گواچی ءُ۔ دا ویل بلوچستان نا کنڈ کنڈ ئٹ ہر خاہوت ئے پلویڑ کرینے و بیگواہ کننگوک بندغ آتیٹ گیشتر سیاسی ئہ چاگڑدی باسک و خوانندہ غاک اوار ءُ۔
سلمان اراتم بیگواہ کننگا؟
سلمان بلوچ نا خاہوت نا رد ئٹ سلمان ئے 13 نومبر 2022 ئٹی کوئٹہ غان بیگواہ کننگانے و اینو دے اسکان اونا ہچو حوال و ڈس ئہ پت اف۔
سعدیہ بلوچ نا پاننگ ءِ کہ "ہراتم سلمان بیگواہ کننگا، او وخت کنا باوہ نا بھلا مار، اونا کوپہ و اسہ مہروانو مار ئس اوڑان پھلنگا۔ کنا باوہ ئے مہالو آن است ئنا ناجوڑی اسک ولے داخس پاش الو، ہراتم سلمان بیگواہ کننگا گڑا کنا باوہ بھاز نزور مس۔ سلمان نا ہم اندا خلیس اس کہ اللہ کپ کنے گڑاس مس کنا ناجوڑ آ باوہ ئے دیر ہرو۔ او تینا ماری آ ذمہ واری تہ پورو کننگ نا ارمان تون زندان ئٹ بند مس۔”
سلمان بلوچ نا ایڑ آن سوج کننگا کہ او کوئٹہ غا انتئے ہناسس تو اونا پاننگ اس کہ سلمان سیکنڈ ایئر (12) پاس کرے اوکان گڈ سلمان ئے باوہ نا جاگہ غا نوکری آ تخنگا۔ او خضدار انجینیئرنگ یونیورسٹی نا درگہ غا ‘گیٹ مین’ اسک۔ اونا نوکری عارضی اس و تینا نوکری نا پکا کرفنگ کن اودے تینا کاغد آک خواست اسر ہرا اوڑان گوائنگاسر، ہموفتا کشفنگ کن او شال آ ہنا، ہراکان اودے پاکستانی ڈھکوک ایجنسیک بیگواہ کریر۔
سلمان نا کیس:
ہراتم اونا خاہوت آن اونا کیس ئنا بارو ئٹ سوج کننگا تو اوفتا پاننگ اس کہ نن اول سلمان نا ایف آئی آر ئے کتون انتئے کہ ننے علاقہ نا میر معتبر آک اندا سلہ تسر کہ سلمان کن توار بڑز کپبو او ہچو ڈوہ ئس کتنے اودے یلہ کننگو۔ ننے خُلیفنگ مس کہ اگہ سلمان کن ہیت کریرے تو اودے آجو کننگ نا جاگہ غا ریاستی ادارہ غاک نسخان ایتور۔
او پارے کہ یک و نیم سال ئنا گنار آن گڈ ننا اومیت آک پنار و نن سلمان کن توار بڑز کننگ نا فیصلہ کرین و دسمبر 2023 ئٹی اوڑکن خضدار ئٹ پریس کانفرنس کرین۔ 17 فروری 2024 آ پولیس اسٹیشن سیالکوٹ کوئٹہ ٹی اونا بیگواہی نا ایف آئی آر ئے کرین۔
سلمان نا ایڑ سعدیہ بلوچ پارے کہ ایف آئی آر و پریس کانفرنس آن بیدس زوراکی ئٹ بیگواہ کننگوک بلوچ آتیکن کاریم کروک تنظیم ‘وائس فار بلوچ مسنگ پرسنز’ ئٹ اونا کیس ئے تسن۔ اندن بندغی حق آتا جہانی ادارہ ایمنسٹی انٹرنیشنل، بی این ایم نا بندغی حق اتا ادارہ پانک، ہئومن رائٹس کمیشن نا بیگواہ غا بندغ آتیکن اڈ تروک کمیٹی ٹی ہم اونا کیس ئے جمع کرین۔
بلوچستان ئٹ زوراکی نا بیگواہی تا کیس آک بھاز وختا اندا سوب آن ہم رپورٹ مفسہ کہ خاہوت آتہ علاقہ نا میر معتبر آتون اوار، سیال عزیز آک بیم ئنا گواچی کیرہ یا رد مشورہ ایترہ و خاہوت آتہ توار بڑز کننگ یا دا رد ئٹ ہیت کننگ آن توررہ۔
اندن زوراکی نا بیگواہی تا گواچی مروک بندغ آتا خاہوت آتہ ریاستی ڈھکوک ایجنسیک ہم بیم ئنا گواچی کیرہ و توار بڑز کننگ نا دروشم ئٹ اوفتا بندغ آتہ نسخان تننگ نا دڑکو ایترہ ہرا نا سوب آن خاہوت آک سال تا سال تینا بندغ آتا نہ ایف آئی آر ئے کرفرہ نئے اوفتیکن توار بڑز کیرہ۔
سعدیہ بلوچ ودیک پارے کہ "کنا لمہ باوہ نن و دے سلمان نا اسہ کلہو ئسیکن ہروک ءُ کہ نوا اسٹ برے و کنا لعل ئنا کلہو ئس ایتے کنا لمہ باوہ پیر و نزور مرسہ زند ئنا آخری دے تہ سلمان نا یات ئٹ تیر کننگ ءُ ولے سلمان نا آجوئی نا بابت ئٹ دائسکان ننے اسہ جوانو حوال ئس رسینگتنے۔ ننے اسٹ ئس ہم پاپک کہ آیا سلمان سلامت ارے یا اف۔ نن دے و نن دروازہ غا خن تہ خلوک تینا ایلم، تینا کوپہ، تینا سکون نا گنار ئٹی ان کہ اراتم سلمان آجو مرو۔”
سعدیہ بلوچ تینا ایلم نا بیگواہی نا ڈکھ ئے درشان کننگ آ پارے کہ ” کنتون ہچ لوز اف کہ ای پاو کنا ایلم نا بیگواہی آ نن ارا ڈکھ آن گدرینگنگ ان۔ خدا خنک دڑد لکھنگ و پاننگ ئٹ بیان مفک، ای اخس کوشش کیو ولے کنتو ہمو لوز آک ودی مننگ کپسہ ہرا ننا کیفیت ئے بیان کننگ کیر۔”
سلمان نا خاہوت آن پین دیر بیگواہ کننگانے:
سلمان تینا خاہوت نا اولیکو بیگواہ کننگوک بندغ اف، داکان مست اونا خاہوت آن ارا بیگواہ کننگوک ورنا آصف بلوچ و رشید بلوچ دائسکان بیگواہ ءُ۔
آصف و رشید بلوچ ئے 31 اگست 2018 آ زنگی ناوڑ، نوشکی آن پین 9 بندغ تون اوار پاکستانی لشکر دزگیر کننگ آن گڈ بیگواہ کرے۔ پن کروک بندغ آتان آصف بلوچ بیگواہ سلمان نا الہ مار و رشید بلوچ اونا تاتہ نا مار ءِ۔
خاہوت نا رد ئٹ آصف و رشید نا دزگیری پھاش ہم کننگاسس و اوفتا دزگیری نا عکس آک ہم مونا ہتنگار، پدا ہم اوفتہ نہ عدالت ئسیٹ ہتنگا نہ اوفتہ آجو کننگانے۔
داکان بیدس خاہوت نا رد ئٹ عبدالمنان و سرفراز ئے 30 اکتوبر 2022 آ پاکستانی لشکر خضدار آن دزگیر کننگ آن گڈ بیگواہ کرے، وختس خاہوت اوفتا بیگواہی نا برخلاف برانز کرے تو اوفتہ 10 نومبر 2022 آ سی ٹی ڈی نا ذریعت ئٹ پھاش کننگا و کوئٹہ نا خڑک آن اوفتا دزگیری ئے پھاش کرسا اوفتا دروغ ئنا کیس خلنگا۔
پن کروک بندغ آتان عبدالمنان سیالی ٹی بیگواہ سلمان بلوچ نا الہ (لمہ نا ایلم) مریک، و سرفراز اونا تاتہ نا مار ء۔
بلوچستان ئٹ زوراکی نا بیگواہی تا دیہاڑ:
بلوچستان ئٹ زوراکی نا بیگواہی تا ویل پوسکنو ویل ئس اف، دا ویل بلوچستان ئٹ سیاسی ئہ چاگڑدی باسک آتا بیگواہی آن بناء مرسا داسا بلوچستان نا کنڈ کنڈ ئٹ خوانندہ و لس مخلوق ئے پلویڑ کرینے۔ ولے دا نا ایسری کن دائسکان ہچو موثرو گھامگیج ہرفنگ متنے۔
بھاز آ بلوچ قوم پرست تپہ غا تا دعوی ءِ کہ بلوچستان ئٹی برجاء بیدس قانود زوراکی نا بیگواہیک ہفتاد نا دہک آن برجاء ءُ و دا ویل ئٹ بیست و یکمیکو کرن ئنا اولیکو دہنک آن ترندی ہتنگانے۔
تدوکا منہ سال ئٹ زوراکی نا بیگواہی تتون اوار بیدس عدالت بلوچ ورنا تا خون تیٹ ہم ودکی مسنے۔ دافتا گواچی مروکا تیٹ گیشتر کچ ورنا و خوانندہ غا تا ءِ۔ بلوچ سیاسی، چاگڑدی و بندغی حق آتا تنظیم آتا رد ئٹ دا بلوچ زنک ایسری نا پوسکنا چھول ئٹ ریاستی فوج، ڈھکوک ایجنسیک و ریاستی لشکر نا مخ تف سلاہ بند ٹولی ڈیتھ سکواڈ تد ءِ۔
ہفتاد نا دہک ئٹی پنی آ بلوچ راج دوست سروک شیرو مری تینا اسہ انٹرویو ئسیٹی پاریسس کہ پاکستانی لشکر بلوچ آتا چُنک سن مسن تہ ہرفسہ پنجاب نا منڈی تیٹ بہا کیک۔ اونا پاننگ اس کہ گیشتر مسن تا لمہ باوہ غاک تینا غٹ مڈی تہ لیلام کرسا پیسہ مچ کیرہ و تینا مسن تہ جسم فروشی نا اڈہ غا تیان واپس ہتیرہ۔
اندن ہفتاد نا دہک ئٹ بلوچ مزاہمتی تحریک ئٹ بشخ ہلوک کماش آ بلوچ دانشور میر محمد علی ٹالپر ہم تینا آرٹیکل تیا ساڑی کتاب ‘دی رینائسنس آف بلوچ ریزسٹینس’ ئٹ ہمو وخت ئنا زوراکی نا بیگواہی تا رد ئٹ نوشتہ کرینے۔
برجاء بلوچ زنک کش پالیسی تا برخلاف دا وختا بلوچ راج دوست تنظیم آتہ تینا پالیسی تیا نظر ثانی کننگ و موثرو گھام ہرفنگ نا گرج ءِ۔ زنک ایسری نا برجاء چھول ئنا برخلاف دا وختا علاقائی حوالہ ئٹ غٹ آن زیات سرگرم تنظیم "بلوچ یکجہتی کمیٹی” گوندنگک ہرا تدوکا منہ سال ئٹ بلوچ زنک ایسری نا برخلاف بھلو برانز و مچی اڈ تسنے ہرافتہ جہانی پڑ آ ہم گورج رسینگانے و جہان نا پام بلوچستان ئٹ زوراکی نا بیگواہی تا ویل آ ہڑسینگانے۔ و داکان بیدس وائس فار بلوچ مسنگ پرسنز ہم دا رد ئٹ اسہ وے دمدروکو جہد ئس کننگ ءِ و دا وختا زوراکی نا بیگواہی تا برخلاف کل آن مرغنا ‘بین برانز’ ئے چلفنگ ءِ۔
داکان بیدس جہانی تیبر آ بلوچ نیشنل موومنٹ نا کنڈ آن ہم دا رد ئٹ چائندئی تننگ کن جتا وخت آتیٹ پروگرام اڈ تننگانے و جہانی کہول نا پام ئے دا کنڈ آ ہتنگ نا کوشست کننگانے۔
داسا دا ویل آ جہانی کہول و جہانی بندغی حق اتیکن کاریم کروک تنظیم آتہ ہم تینا ذمہ واری تہ سر تروئی و بندغی نا برخلاف دا ڈوہ آ پاکستانی ریاست و اونا ادارہ غا تیان ورندی ہلنگ نا گرج ءِ۔
