پاکستان نا دارلحکومت اسلام آباد ئٹی نیشنل پریس کلب نا مونا بلوچ نسل کشی نا برخلاف برانز 44 امیکو دے برجاء ءِ۔
ہندا وخت زوراکی ئٹ بیگواہ مروکا بندغ و ریاستی جبر نا گواچی مروکا بندغ آ تا رجسٹریشن کننگا ۔
بلوچ یکجہتی کمیٹی نا کیمپ آ تنیا بلوچ نا بلکن کے پی کے ، سندھ ، مُسکوہی فاٹا و گلگت بلتستان آن تعلق تخوکا بندغ آک ہم تینا بندغ آ تا بیگواہی نا رجسٹریشن ئے کریفنگ ءُ۔
خاوت آ تا پاننگءِ کہ بلوچستان نا شہر تُربَت آن پیشتموک آ کاروان تیوعہ پاکستان نا غریب انگا اُلس ئے ظلم و ناانصافی نا برخلاف مزاحمت نا نعرہ تون اوار کرینے، زندہ مننگ نا جدوجہد ئٹی ننا بندغ آک ننا اُمیت و روحءُ ۔
بلوچ یکجہتی کمیٹی تینا شنگ کروک آ درشان ئٹی پارے کہ بلوچ نسل کشی نا برخلاف برجاء انگا تحریک ئے اینو 44 امیکو دے پوروءِ، دا تیوعہ وخت ئٹی ریاست سنجیدگی و ذمہ واری نا مظاہرہ کننگ نا جاگہ ظلم و جبر کننگءِ ہرانا برخلاف بلوچ یکجہتی کمیٹی 3 جنوری آ اسلام آباد دھرنا آن دا تحریک نا مسٹمیکو بشخ ئنا پڑوئے کرینے ہراٹی بلوچستان تون اوار تیوعہ پاکستان ئٹی برانز مرو ۔
درشان ئٹی تیوعہ بلوچستان ئٹی برانز آتا شیڈول نا پڑو کننگا ہرانا رد ئٹ کوئٹہ ، شرافی گوٹھ ملیر ئٹی 7 جنوری ، کیچ و پَنجگُور ئٹی 8 جنوری ، قلات ، منگچر ، سوراب ، مستونگ ئٹی 9 جنوری ، کوہلو ، ڈیرہ بگٹی ، ڈیرہ غازہ خان ،بارکھان ، تونسہ ، رکھنی و ملیر (مُراد ہند ) ئٹی 10 جنوری ، خاران ، بیسیمہ ، نوشکی و دالبندین ئٹی 11 جنوری ، کراچی ئٹی 12 جنوری ، حب ، وندر ، اوتھل ، آواران و مشکے ٹی 13 جنوری ، نصیر آباد، سبی ، لورائی و بولان ئٹی 14 جنوری ، خضدار ، نال ، وڈھ و گریشہ ئٹی 15 جنوری ، گڈانی ، گوادر ، اورماڑہ و پسنی ئٹی 16 جنوری آ برانز مرو ۔
درشان ئٹی پاننگا کہ دا ہند آ تیان بیدس ایلو ہند آ تیٹ اگہ اُلس برانز کننگ خوائک اوفک بلوچ یکجہتی کمیٹی نا ذمہ دار آ تون رابطہ کیر ۔
