زوراکی ئٹ بیگواہ کننگوک ظہور سمالانی نا آجوئی کن ارا دے آن برانز برجاء، تولوک برانز نا سوب آن کسر بند ءِ، ہڑتما کنڈ آن ہن ئہ بر بند مننگ نا سوب آن الاخ آتا مرغن قتار لگوک ءِ۔
اینو خاہوت تینا برانز ئے شابیت ترسا تفتان آن شال، و شال آن کراچی آ ہنوکا کسر تہ اِرا جہہ آ ہر وڑ ئنا ہن ئہ بر کن بند کرینو۔
خیال ئٹ مرے کہ تدوکا 24 ساہت آن نواب ہوٹل نا جہہ آ تولوک برانز برجاء ءِ، داسا برانزیک تینا برانز ئے شابیت ترسا لکپاس نا جہہ آ ہم تفتان آن کوئٹہ غا ہنوکا کسر ئے برانز کرسا بند کرینو۔
برانزیک پارینو کہ اگہ اوفتا بندغ آک آجو کننگ متور تو او تیبہ بلوچستان نا کسر تہ بند کرور۔
اوفتا پاننگ ءِ کہ سیکورٹی ادارہ غاک ظہور سمالانی و سیدگل سیدکلانی نا آجوئی کن اُست سفا افس و گپ تران کن بروکا افسرک مہالو آن دا ہیت ئے کیرہ کہ ننتو اختیار اف نن بیوس ان۔ اوفتہ بیگواہ غا بلوچ آتون ہچو ہلْ ئہ تس ئس اف۔
او حکومت نا بڑزکو کوالخواہ تیان خواست کرینو کہ او بیوس آتہ ننے آ گپ تران کن راہی کپس ہرافتتون ختیار ارے ہمو بریر تاکہ بیگواہ کننگوک ظہور سمالانی و سیدگل سیدکلانی ئے آجو کننگہ۔
او پارینو کہ اگہ حکومتی ادارہ غاک بیگواہ کننگوک بندغ آتا آجوئی کن گھام ہرفتور گڑا نن تینا برانز ئے پین شابیت ایتون و دا رد ئٹ بلوچ قوم آن خواست کینہ کہ او ننتو کمک کیر تاکہ زوراک و ظالم آتا خن تیٹ خن خلِسہ بیگواہ کننگوک بندغ آتہ آجو کرفنگ کین
او ٹرانسپورٹر و مسافر آتا تھورو ئے ہرفِسہ پارینو کہ او پِھر و یخ ئٹ سگ ئنا درشانی کرسا ننتو کمک کرینو و ننتو تولوک برانز کننگ آن بیدس پین ہچ کسر اف۔ نن بیوس مرسا چنا تیاڑی تہ روڈ آ تولفینن۔
