نوشت: عزیز سنگھور
مٹ: مبارک بلوچ
زرمبش براہوئی
ہئو، بلوچستان اسہ وار پدا دتر ئٹ اسٹ مس۔ دا چرجوئی نہ تو پوسکُن ءِ نئے کہ غیر متوقع۔ زوراکی نا بیگوائیک و ٹک کرسہ کھسفنگ (ٹارگٹ کلنگ)، دا کُل اسہ ایسر مفروکو المیہ ئسے نا دروشم ئے ہلکنو۔
حیات سبزل ئے 03 جولائی 2024 آ میری باغ آن دزگیر کننگاسس۔ هرانا آجوئی کن اونا خاہوت تُربَت پریس کلب ئٹ پریس کانفرنس کرے و کالخواہ تتون تران کرے، ولے بد بختی ئٹ 10 فروری 2025 نا نن اونا جون پَنجگُور آن دُو تما۔ دا تدینی آن پد اونا جون ئے تُربَت نا شہید فدا احمد چوک آ ہتنگا۔ ہراڑے اونا خون ئنا برخلاف تولوک برانز بناء کننگانے۔
ایلو کنڈ آن اینو (11 فروری) آ تُربَت ئٹی سلاہ بند بندغ آک سُمکاری کرسا پنیئا شخصیت شریف ذاکر ئے ٹپی کرینو۔ یات مرے کہ شریف ذاکر نا مار کامل و اونا اسہ پین سیال ئس زوراکی نا بیگواہی تا گواچی ءِ۔
دا تدینیک بلوچستان ئٹی زوراکی نا بیگواہی و بندغی حق آتا لتاڑ نا اسہ مثیل ئسے ءُ، ہرا جہی مخلوق ئٹ بھاز فریشانی و ڈکھ ئہ خار ئنا سوب جوڑ مننگ ءُ۔
دا حالیت بلوچستان ئٹی ودھوکا بندغی حق آتا کاختی و زوراکی نا بیگواہی تا المیہ نا اسہ پین گندہ ءُ مثیل ئس ءِ۔ حیات سبزل نا زوراکی ئٹ بیگواهی آن پد اونا جون ئنا دُو تمّنگ دا ہیت ئنا ثبوت ءِ کہ دا وڑ ئنا تدینیک اسہ وڑ برجاء ءُ۔ و حکومت نا ادارہ غاک یا تو دا ویل ئنا ایسر کننگ ئٹ بےسون ءُ یا دا ٹی تد ءُ۔
اندا وختا تُربَت ئٹی شریف ذاکر آ سُمکاری نا تدینی ودیک بےجاراتی و بے رکھوک مننگ (عدم تحفظ) نا گبان ودی کننگ ءِ۔ دننگا جلہوک نہ بیرہ خُلیس تالان کیرہ بلکہ بلوچستان ئٹی درشانی نا آجوئی (آزادی اظہار رائے) و سیاسی ئہ چاگڑدی بندغ آتہ ٹک کننگ نا رجحان ئے پھاش کیک۔
دا تدینی تیا حکومت و بندغی حق آتا ادارہ غاک سوبری ئٹ پام ایتر، انتئے کہ زوراکی نا بیگواہیک و بيدادی نا دا تدینیک خطہ ئٹ مست آن ساڑی عدم استحکام ئے پین زیات کننگ ءُ۔
حیات سبزل، شریف بلوچ، ظریف بلوچ، اللہ داد بلوچ، زکریا بلوچ، نوید حمید بلوچ، افضل بلوچ و واحد رمضان کون آ پنک بیرہ منہ مثیل ء ہرا چرجوئی ئٹ برجاء زوراکی و زوراکی نا بیگواہی و بیدس عدالت خون تا گواچی مسنو۔
بلوچ یکجہتی کمیٹی نا پارہ غان شہید فدا چوک آ مُسہ دیئی برانزی گِدان نا اینو(11 فروری) آ مُسٹمیکو دے ءِ ہرا نہ بیرہ دا ظلم آتا برخلاف اسہ مزاحمتی گھام ئس ءِ بلکہ بلوچستان ئٹی برجاء زنک ایسری ئے دنیا نا مونا پھاش کننگ نا اسہ کوشست ئس ءِ۔ ولے ایلو کنڈ آن بلوچ فرزند آتا بیدس عدالت خون تا لڑ برجاء ءِ۔ ہراڑان پھاش مریک کہ حکومت دا توار آتہ چُپ کننگ نا کوشست کننگ ءِ۔
ڈی سی کیچ ئنا پارہ غان دا پاننگ کہ "حیات سبزل بےڈوہ ءِ و زوت سرسلامت ارا برو” بیرہ اسہ دروغ ئس ثابت مس، انتئے کہ دا باور تننگ آن پد ہم اونا جون ئے پَنجگُور ئٹی خسنگار۔ دا تدینی دا گواچن ئے پین سوگو کیک کہ قانود نافد کروکا ادارہ غاک دا زوراکی نا بیگوائی و بیدس عدالت کھسفنگ ئٹی نہ بیرہ تد ءِ بلکہ زیمی مروکا خاہوت آتہ دروغ ئنا دلاسہ ترسہ اوفتا برانز ئے نزور کننگ نا کوشست ہم کیرہ۔
سر شریف بلوچ کون ءُ استاد ئسے آ جلہو آن دا پھاش مریک کہ بلوچستان ئٹی خواننگ جاہک ہم رکھوک افس۔ خوانفوکا شخصیت آتیا جلہو اصل ئٹ شعور، و درشانی نا آجوئی آ جلہو ءُ۔ تاکہ ورناک چائند آن مُر مریر و اوفتیٹی خُلیس ودی مرے۔
دا تدینیک دا ہیت ئنا ثبوت آکو کہ ریاستی زوراکی تیٹ ترندی بسنے و جہانی کہول و بندغی حق آتا ادارہ غاک داڑا ڈوہداری چُپی (مجرمانہ خاموشی) ئے تینائی کرینو۔ بلوچ ورنا، استاد و سیاسی باسک آتہ ٹِک کننگ نا دا لڑ اسہ منظم زنک ایسری ئسے نا پارہ غا اشارہ کیک۔ ہراڑے حکومتی ادارہ غاک نہ بیرہ بلوچ آتا توار ئے توننگ ءُ بلکہ اوفتا ٹیوار ئے ہم ایسر کننگ نا کوشست کننگ ءُ۔
دا ظلم ئنا برخلاف چُپ مننگ اسہ ڈوہ ئسے نا بریبر ءِ انتئے کہ داسا چُپ مننگ نا مطلب تینا واری نا گنار ءِ۔ "بلوچ آتا برخلاف دا ظلم آ چُپ مننگ دراصل دا زوراکی تہ زیات کننگ کیک۔
دہنی ٹی بی وائی سی کون آ سیاسی تلہ، بلوچ اُلس ئنا اشتماعی برانز و جہانی تیبر آ دا ویل آ روشنائی شاغنگ نا گرج ءِ، تاکہ دنیا بلوچستان ئٹی برجاء دا کشت و خون ئے خننگ کے۔
