” سنگت نا مہر "

نوشت: دیار زیب

زرمبش براہوئی

سنگتی اسہ اندُنو گِڑا ںٔس ءِ کہ گر نے تینا سنگت تون راستی ئٹ مہر و مابت مرے گڑا او زند ئنا ایسری اسکان مریک۔ او سنگتی خلق ئنا کوچہ ٹی مرے یا کہ شُور پارود نا زیبدار آ مَش تیٹی مرے او اسہ زیباؤ دروشُم ںٔسیٹی مریک۔ راستی ئٹ سنگتی ہمودے پارہ ہراٹی تینا سنگت تون ہمگھام مش و ٹیڑ تیٹی پند خلنگ، ملاسی و بینگُنی ٹی مِزل کن مُستی گھام خلنگ، تہارمہ ٹی بے تُغ مننگ، یخ و باسُنی تہ سہنگ، جنگ ںٔٹی سنگت تون ہمرہ مننگ، دُژمن آ جلہو کننگ و سُم شلنگ، دلبرو آ ماران نا ٹُل ںٔسے آ تولوک گپ و کچاری کننگ، ناگاؤ و خیصار نا ندارہ تون بشخندہ مننگ، سُم تا امیل ںٔٹ تینا گڈیکو سُم ئے تخننگ، جنگ ںٔٹ تینا سنگت تون سوگو آ ایمان تون ہمرہ مننگ، بولان نا زَم زَم کون آ دیر تیان تینا ملاسی ئے پرغنگ، نرمُک و اسپلنجی نا مش تا نیام آ خید ںٔٹ چُڑوکا جون ئتون پند خلنگ، دا اسہ بھاز گیچینو ساعت ںٔس ءِ ہر سنگت کن۔

اندُن اسہ ورنا ںٔس تینا راج ئنا بے وسی، لنگڑی، بزگی، شپادی و غٹ ڈُکھ و ویل آتہ سرپند مریک۔ او تینا خاہوت، سنگت و ایلو مُچا مخلوق ئے، تینا مراد و خوئشی تہ غٹ آسراتی تہ اِلک و خلق آن سر اَلیک تینا مزل ئے مارسہ کائک ہمو زیبدار آ مش تیٹی ہرافتیٹی زیبدارو جنگ ںٔس مننگ ءِ و او جنگ ئٹی چندی زیبدار آک تینا بے مٹ آ ساہ تہ ندر کرینو ولے دژمن نا مونا بے وسی نا مودہ ئے کشتنو، دا لس بندغ نا کاریم اف کہ تینا ذات ئتون گنڈوکا ہر گِڑا ئے ندر کننگ اسہ کڑدار ںٔس جوڑ مننگ کن بندغ تینا تیوہ زند ئے تینا راج ئکن ندر کیک گُڑا او کڑدار ئے مُچا راج سرپند مریک کہ اسہ ورنا ںٔس تینا زند آن گیشتر تینا لُمہ ڈغار تون مہر و مابت کیک و تینا گڈیکو سُم اسکان بشخندہ و ٹاکو خلِسہ کائک گُڑا دا راستی نا سَگ، سِینہ، حوصلہ و جغر خوائک مَش ںٔٹ ملاسی ٹی پند خلنگ، خل تِہ سڑجہ کننگ، ٹاک و آہڑ تیٹ پند خلنگ، بے تُغ آ خن تا پُوتُڑو مننگ بیرہ ہیت ںٔٹ اڑزان ءِ ولے راستی ںٔٹ چلتنیؤ جیرت خواہرہ۔

ہرا وخت ایلو سنگت ئے سما تمک کہ کنا ہنین انگا سنگت خلق آن مش تیکن سر الکُنے انانے گُڑا اوڑا ڈغار تِین مریک تینا سنگت آن مُر مننگ اوڑکن باز بھلو گَڑتی ںٔس مریک و تینا سنگت نا ہنینا گپ، کچاری، شُغل، دیوان وبشخندہ غا تہ ساعت ںٔس سوچ ںٔٹ اتیک پدا او ہم اندا فیصلہ کیک کہ گر کنا ہنین آ سنگت ئےِ راج ئنا بزگی و خواری، آسراتی ئٹ تولنگ کن التوّ گُڑا کنا ہم داڑے تولنگ نا ہچو مسخت ںٔس اف اَگہ او دژمن نا مونا خن تہ شیف کتو گڑا ای ہم دا غلامی ٹی تینا زند ئے تیر کپرہ۔ ہرا وخت کہ ہیت ننگ آ بس گُڑا دژمن نا بیھم ئے چَغل تیروںٔی ءِ و تینا گڈیکو سُم اسکان دژمن ئے دک خلوںٔی ءِ۔ اگہ کوزہ گِیر غلام آتون ہر گڑا کننگ کیک گڑا ای ہم تینا ڈغار و ننگ ںٔنا رکھ ںٔکن مرگ ئے خُمب ئٹ کرسہ اودے بخیرٹ پاوہ۔ او اندا سرپند اس کہ خلق ئے النگ، ملاسی و بینگنی تِہ سہنگ مش تا خل تہ سڑجہ کننگ بھاز کُبین ءِ ولے بیرہ او تینا راج ئے گچین و ہنینو سہب ںٔسے نا ڈس تننگ کن و تینا سنگت تون ہم ہمرہ مننگ کن بے جارات اس۔ اونا ہمو گپ آتیکن، ہمو بشخندہ گل و شُغل تیکن، ہمو مہر و مابت نا گپ آک ہراٹی سنگت تون تیوہ غا نن ئے تیر کریکہ او اندا تکاکہ کنا ہنین آ سنگت نا بڈ آ توفک امر زیب کرو کنا ہنین آ سنگت نا بڈ ئنا توفک اَلم پین اودے روب تیرو۔ او زہیری اس، ہمو غٹ ندارہ غا تہ خننگ کن پدا او ہم چُپی ٹی خلق آن سر الیک و تینا سنگت نا رند ںٔٹ مستی گھام خلیک ہمو زیبدار آ مش تیکن ہرافتیٹی اونا سنگت تون اوار چندی دلیر آک تینا تیوہ زند ئےِ ندر کننگ ءُ و نن کن اسہ گچینو سہب ںٔس ہتنگ کن۔

اڑتوما سنگت آک خلق آن سر الکر سما اف شور پارود نا پوشکنا مش تیا مون کریر، سما اف دا وخت بولان آ پند خلنگ ءُ، سما اف سنگت آک گزی و مہلبی ٹی دژمن آ جلہو ںٔس کننگ کن گھام خلنگ ءُ، مننگ کیک اوفک دا وخت آ ناگاؤ نا ٹل ںٔسے آ دیوان و کچاری ٹی مش ئے کاٹم آ ارفور، سما اف ماران آنبار آ مش تیٹی پند خلنگ آن نت تا تلف آک کپ کپ مرور، دیچہ مننگ کیک سنگت آک نرمُک و اسپلنجی نا نیام آ پند کننگ مرور و تاخ ںٔسے کن، مننگ کیک سنگت آک دا وخت مہردار نا مش آ لگنگ نا کوشست ںٔٹ مرور و اندا ساعت ںٔٹ دمدرینگور و دیخس دم کش مرور پدا مستی گھام خلور، سما اف آماچ نا خمب ںٔٹی تولوک مونو چاء ںٔس کننگ ںٔٹی مرور، دیچہ مننگ کیک دا وخت دژمن نا کیمپ آجلہو و سرسوبی آن گڈ ہربوںٔی نا نیام آ رقص ںٔٹی مرور، سما اف لاغر آ مخ آ امیل تفوک مرور و بَڈ آ توفک چلتن نا دے ٹِکی پارہ غا تینا گڈیکو وتاخ ئے جوڑ کرور پدا ساعت ںٔس دیوان کرور، مننگ کیک سنگت آک کابوئی نا ٹُل ںٔسے آ تولوک دژمن آ سُم بیبالنگ کن وداری مرور، آخہ مننگ کیک دا وخت خیصار نا سنگت آتیکن مون کرور، سما اف بَڈو نا پاناد آن تدینگور و شہید آتا دتر تیان تِرک کروکا پُل آتِے گند کشور، مننگ کیک دا وخت اُلاخ آتہ تینا سنج کرور و مارگٹ نا پارہ غا پند خلنگ مرور، سما اف سنگت آک ارا مَشی آ تلار تیٹ تینا زند ئے تیر کننگ مرور۔ ننا عملی آ خواجہ غاک ہموفک ءُ ہرا بھیم، نزوری و لغوری ئے بے خیال کیرہ و تینا گڈیکو سُم اسکان ننے آجو کننگ نا کوشکست ئے کیرہ بس سنگت آک ارانگ ہم مریر مدام سلامت مریر و خدا نا باہوٹ مریر۔