بلوچستان لبریشن فرنٹ نا جارکش میجر گہرام بلوچ میڈیا ٹی شنگ کروک تینا درشان ئٹی پارینے کہ بی ایل ایف نا سرمچارک 25 جنوری ہفتہ نا نن ہشت بجہ غا کوہلو نا جہہ نوئے شم ئٹ لنڈ نا جہہ آ ساڑی ایف سی نا چیک پوسٹ ئے کبین آ سلاہ تیٹ ٹک کریر ہرانا سوب آن ایف سی نا ارا کارندہ لانس نائیک راہب حسین ولد غلام حیدر و اسہ پین سپاہی ئس ہرا نا تعلقداری کشمیر آن اس مرگ ئنا گواچی مسر۔
جارکش پارے کہ کوزہ گیر پاکستانی لشکر تینا لشکر ئٹی ودی مروکا ذہنی دباؤ و تموکا حوصلہ غا تا سوب آن سرمچار آتا جلہو تیٹ کھئوکا تینا کارندہ غا تا ٹیوار و کچ ئے ڈھکنگ نا کوشست کیک ولے بھاز وخت آ کھئوکا کارندہ غا تا خاہوت آتا کنڈ آن اوفتا ٹیوار پھاش کننگک۔
بی ایل ایف نا جارکش میجر گہرام پارے کہ سرمچار آتا سرسوب جلہو آن گڈ دشمن لشکر سرویلنس ڈرون بال تس ہرافتِہ سرمچارک ٹک کرِسہ خلکر۔ ہراوخت سرمچارک ڈرون کیمرہ تِہ خلکر بٹیر تو دشمن لشکر نا کمک و ڈرون تِہ ہرفنگ کن بروکا ہندی ڈیتھ اسکواڈ (مری سیکیورٹی) نا کارندہ غاک ہموجاگہ غا بسر ہراڑا سرمچارک اوفتِہ ہم ٹک کریر ہرانا سوب آن ڈیتھ اسکواڈ نا چھار کارندہ ٹپی مسر۔
اونا ودیک پاننگ اس کہ اسہ پین جلہو ئسیٹ سرمچارک 24 جنوری نا نن یانزدہ نیم آ بولان نا جہہ آپ گم ئٹ کوئٹہ سبی کسر آ ساڑی کوزہ گیر پاکستانی لشکر نا چیک پوسٹ آ جلہو کریر، جلہو یانزدہ نیم آن دوانزدہ بجہ اسکان برجاء سلیس۔ جلہو ئٹی سرمچارک پوسکنا و کبین آ سلاہ تِہ کاریم ئٹ ہتِسہ دشمن نا اسہ کارندہ ئس مرگ ئنا گواچی کریر و مُسٹ ٹپی مسر۔
او پارے کہ کوزہ مروک بلوچستان نا کنڈ کنڈ ئٹ بلوچ سرمچارک کوزہ گیر ریاستی لشکر و اونا کمکار آتِہ ٹک کننگ ءُ، ہرانا ساڑ ئے باء تروکا ریاستی لشکر الس آ جلہو، بیدادی و لٹ ئہ پل نا دروشم ئٹ کشنگ ءِ۔
میجر گہرام ایسر ئٹ پارے کہ بلوچستان لبریشن فرنٹ دا جلہو تا زمہ واری ئے ہرفک و آزاد بلوچستان نا دوئی کننگ اسکان کوزہ گیر لشکر و اونا آلہ کار آتِہ ٹک کننگ نا عزم ئے بھیرو کینہ۔
