بلوچستان نا ضلع کیچ ئنا علاقہ تربت ئٹ نادرست آ سلاہ بند بندغ آک پاکستانی لشکر نا چوکی آ جلہو کریر۔ اندن نصیر آباد ئٹ تراک ئٹی مُسہ بندغ ٹپی مسنو۔
حوال تا رد ئٹ سلاہ بند بندغ آک ازگر گیٹ ئنا پارہ غا پاکستانی لشکر نا بھلو چوکی ئسے ٹک کرینو۔
سُم و تراک آتا توار ہُرے اسکان بِننگ مسنے۔ جلہو ئٹ پاکستانی لشکر ئے جانی و مالی نسخان رسینگ نا گمان ارے۔
دا جلہو نا ذمہ واری ئے دائسکان ہچو تنظیم ئس ہرفتنے۔
ایلو کنڈ آن نصیر آباد ئٹی تراک ئسیٹی مُسہ بندغ نا ٹپی مننگ نا حوال ءِ۔
حوال تا رد ئٹ کٹوہر پل نا ہند آ کسر نا کرّک آ تراک ئس مسنے۔ تراک ئنا پلویڑ ئٹ برسا کسر آن گدرینگوک کار ئٹی سوار مُسہ بندغ ٹپی مسنو۔
ٹپی مروکا تِہ ٹیچنگ اسپتال ڈیرہ مراد جمالی آ رادہ کننگانے۔
تراک آن گاڑی ئے بھاز نسخان رسینگانے۔ واہم تدینی نا بارو ئٹ ودیک حوال دو بتنے۔
