شال پریس کلب نا مونا وائس فار بلوچ مسنگ پرسنز نا زوراکی نا بیگواہی تا برخلاف برانزی گدان ئے اینو 5708 دے مس۔
دا وختا بی ایس او نا مہالو نا چیئرمین زبیر بلوچ، بابل بلوچ و ایلوفک گدان آ بسّر خاہوت آتون اواری نا درشانی کریر۔
وی بی ایم پی نا وائس چیئرمین ماما قدیر بلوچ بروکاتون تران کرسہ پارے کہ اینو نا سخت انگا وخت ہر اسٹ نا کڑد ئے مچّا راج ئنا مون آ پھاش کرینے۔ وی بی ایم پی نا مرغنا و امن ئٹ مروکا جہد ئنا سفر ئٹی گڑاس بندغ وخت ئنا ہِننگ تون الّار ہنار، گڑاس بندغ دشمن نا کرسی و زر ئنا گروشک ئے خنسہ بہا مسّر و گڑاس بندغ تنظیم ئے تینا نوکری و پِن ئنا بُڑزی کن کاریم ئٹی ہیسر ولے اینو ہرا سنگتاک ساڑی ءُ، او وفادار و امن ئٹ مروکا راجی جہد ئتو جْوان وڑئٹ سَلوک ءُ۔ ہندا بندغاتا قربانی تا سوَب آن دشمن نا ہزار آ چم آتان پد ہم تنظیم سوگو ءِ و زوراکی نا بیگواہی تا برخلاف گچینی ئٹ جہد کننگ ئٹی ءِ۔
ماما قدیر بلوچ پارے کہ اینو ہر اسٹ فخر ئٹ پاننگ کیک کہ امن ئٹ بلوچ راجی جہد ننے راجی سما تسّنے، ہرانا سوَب آن ننا تینا دوست و دشمن نا ادارہ آتان دا اومیت تخنگ کہ او ننا توار ئے بنور یا دشمن تینا زوراکی تہ ڈھکنگ کن تینا ادارہ آتہ جتاجتا کرسہ گڑاس ئے ڈوہ دار پائک۔ ایف سی اسہ ریاستی ادارہ ئسے ہرا زیہہ ئنا فرمان آتا پابند ءِ۔ امن ئٹ مروکا بلوچ جہد ئنا برخلاف سی ٹی ڈی و ایف سی آن بارنگا ادارہ آتہ بلوچ زنک ایسری کن مونا ہتنگانے۔
ماما قدیر بلوچ مُستی پارے کہ بلوچستان ئٹی ہر ہمو گڑا ئے خاخر تننگانے ہرا کوزہ گیر نا چیدہ چاننگاکہ۔ ریاست امن ئٹ مروکا جہد ئے چھٹفنگ کن زوراکی کننگ ئٹی ءِ۔ ہزار آ بلوچ ورنا تہ بیگواہ کرسہ اوفتان داسکا ہزار آتا سزا تروک جون تہ خسّنگانے۔
