کابل: اوغان حکومت امریکا ٹی قید اوغان جنگجو خان محمد نا آجوئی کن ارا امریکی شاری آجو کننگ نا پڑو کرے، امریکا ٹی قید خان محمد اوغانستان آ سر مس۔
تومکا کنڈ آن قیدی تِہ یلہ کننگ نا بابت ئٹ خدو ہیت مسس ولے قیدی تِہ یلہ کننگ نا پڑو ہموتم کننگا ہراتم امریکی صدر جو بائیڈن اقتدار ئے ڈونلڈ ٹرمپ نا حوالہ کرے۔
اوغانستان نا ڈنی وزارت (وزارت خارجہ) نا پاننگ ءِ کہ خان محمد کم ئہ ود بیست سال مُست ننگرہار آن دزگیر مننگ آن پد کیلیفورنیا ٹی عمر قید نا سزا ٹی اسک۔
حکومت نا جارکش ذبیح اللہ مجاہد اے ایف پی ئے پارے کہ ارا امریکی شاری آجو کننگانے ہرا 2022 ئٹی دزگیر مسوسر۔ دزگیر مروکا امریکی تا خاہوت آک اوفتا آجوئی نا حوال ئے پک کریر و اوغانستان ئٹی قید ایلو ارا قیدی تا آجوئی نا خواست کریر۔
نیویارک ٹائمز نا رد ئٹ ایلو دزگیر مروکا امریکیک دائسکان اوغانستان ئٹی ءُ ہرافتیٹی ائیرلائن نا مسکوہی میکینک جارج گلیزمین و امریکہ ٹی ودی مروکا محمود حبیبی اوار ءُ۔
طالبان کالخواک مُست ہم پارینو کہ اوفک 2021 ئٹی پدا اقتدار ئٹی بننگ آن پد ہر اسہ ڈیہہ تون جوانو تعلقداری خواہرہ۔
