بی ایل ایف نا جارکش میجر گہرام بلوچ میڈیا ٹی شنگ کروک تینا درشان ئسیٹی پارے کہ سرمچارک کیچ ئنا علاقہ زامران و تربت ئٹی کوزہ گیر پاکستانی لشکر و پولیس ئے مُسہ جتاؤ جلہو تیٹی ٹک کریر، ہراٹی کوزہ گیر لشکر ئے جانی و مالی نسخان رسینگا و پولیس کارندہ غا تا سلاہ تہ دوئی کننگا۔
او پارے کہ بی ایل ایف نا اسنائپر ٹیکٹیکل ٹیم 17 جنوری نا دے دوازدہ بجہ نا وختا زامران ئٹی چُر مبارکی کوہ ئنا جہہ آ کوزہ گیر لشکر نا اسہ کارندہ ئسے ٹک کرسا خلک، داکان پد دشمن لشکر نا ہن ئہ بر ئے ہُرسہ سرمچارک خودکار سلاہ تہ کارمرز کریر۔ ہراٹی دشمن لشکر ئے پین جانی و مالی نسخان تون مون تروئی تما۔
اونا پاننگ اس کہ ایلو جلہو زامران نا ہند پگنزان ئٹی کوزہ گیر لشکر نا چوکی آ کننگا ہراڑے پوسکن و بھلا سلاہ تہ کارمرز کننگا ہراڑان دشمن لشکر نا اِرا کارندہ ٹپی مسر۔
ترجمان پارے کہ مسٹمی جلہو تربت سنگانی سر ئٹی پولیس چوکی آ کننگا، سرمچارک پولیس نا سلاہ تہ کوزہ کرسا چوکی ئے ہُشار و پولیس کارندہ غا تہ بلوچ مننگ نا بنداو آ یلہ کریر۔
او دیک پارے کہ کوزہ گیر لشکر مشی ہند آتیٹی تولوک بندغ آتِہ پیش تمنگ کن بیوس کرینے انتئے کہ گوریلہ جنگ ئنا ترندی کوزہ گیر لشکر ئے نفسیاتی ناجوڑ کرینے ہندا سوب آن او ہر بلوچ ئے سرمچار پُہہ مریک ہرا اونا بےسوبی نا نشانی ءِ۔
جارکش ایسر ئٹ پارے کہ بلوچستان لبریشن فرنٹ دا مسٹ انگا جلہو تا زمہ واری ئے ہرفک و پولیس ئے تنبیہ کیک کہ او سرمچار آتا تعاقب آن پہریز کیر اگہ نہ اوفتِہ ہم ٹک کننگو۔
اسہ پین بیان ئسیٹی میجر گہرام پارے کہ سرمچارک آواران نا ہند پیراندر ئٹی ہژدہ جنوری سئے بجہ غا تعمیراتی کمپنی نا اُلاخ آتِہ نسخان تسُر و اوفتا سیکیورٹی کن سلوک کارندہ غا تہ جلہو کریر۔
تعمیراتی کمپنی نا کارندہ آک ہندا جہہ آ کسر جوار کننگ ئٹی گھٹ اسُر کہ سرمچارک جلہو کرسا اوڑے اُلاخ آتہ نسخان تسُر و اوکان زرس مُر پاکستانی لشکر نا چوکی آ ہم جلہو کریر ہراٹی اوفتِہ جانی و مالی نسخان ہرفوئی تما۔
او پارے کہ بلوچستان لبریشن فرنٹ دا جلہو تا زمہ واری ئے ہرفک و آجو بلوچستان اسکان کوزہ گیر لشکرئے ٹک کننگ نا عمل ئے برجاء تخنگ نا قول کیک۔
