بلوچ آجوئی دوست راہشون و بلوچستان لبریشن فرنٹ نا کماش ڈاکٹر اللہ نزر بلوچ چاگڑدی حوالکاری میڈیا تلہ ‘بلیو اسکائی’ آ تینا مسہ گْونڈو درشان ئٹی بلوچستان ئٹی پاکستانی لشکر ئے باء تروک پارسہ لکھانے کہ او تینا جون تہ ڈھکنگ و راستی ئے نپڑیفنگ نا کوشست ئٹی ءِ۔
او پارینے کہ پاکستانی لشکر تینا برجاء غا بےسوبی تیان پد نہ بیرہ جنگ ئنا پِڑ آ اخلاقی و ذہنی پد ماندگی نا گواچی مسنے بلکہ تینا جون تہ و راستی ئے نپڑیفنگ نا کوشست ئٹی ہم آختہ ءِ۔
بلوچ راہشون نا پاننگ اس کہ گوادر آن ہلیس کوہ سلیمان اسکان، بےسوب آ دشمن لشکر بے ڈوہ آ بلوچ اُلس آ زوراکی کننگ ئٹی ءِ۔ دا زوراکیک نہ بیرہ بندغی حق آتا لتاڑ ءُ بلکہ اسہ کوزہ گیر ریاست ئسے نا نہاری آ سوچ ئے ہم پھاش کیرہ۔
اونا پاننگ اس کہ گوادر نا تدینی و ایلو تدینیک دا ہیت ئنا شاہدی ایترہ کہ ہراتم پاکستانی لشکر جنگ ئنا پِڑ آ مون تننگ کپ تو تینا بےسوبی نا بیر ئے لس اُلس ئے خلّنگ ئٹ ہلیک۔
بی ایل ایف نا کماش نا پاننگ اس کہ دا اسہ منظمو زنک ایسری ئس ءِ۔ داسکان بلوچ راج تینا آجوئی نا جہد ئٹی بھلو سگ ئس تخانے۔ ولے اگہ دا زوراکی برجاء سلیس تو او دے مُر اف ہراتم بلوچ اُلس بیوس مرسہ گام ہفّو، ہرانا سوَب آن پنجاپ و اسلام آباد نا رکھ مننگ سخت مرو۔
