ڈیرہ بگٹی نا علاقہ پیرکوہ ٹی بیست و دو سالی زالبول خیر ئٹ مننگ وخت آ دارو درمان مفننگ نا سوب آن چنا تون اوار بیران مس۔
یاتی مرے ڈیرہ بگٹی ٹی گائنالوجسٹ یا زالبول ڈاکٹر مفننگ نا سوب آن زالبول تِہ خیر ئٹ مننگ وخت آ دو سد کلو میٹر پنجاب نا علاقہ رحیم یار خان و صادق آباد آ دننگک ہراڑے کسر ئٹ زالبول تا چناک ودی مریرہ اندن بھاز آ زالبول و چناک ہموتم بیران ہم مریرہ۔
ضلع ڈیرہ بگٹی مُسہ تحصیل تیا تالان مُسہ لکھ آن زیات آبادی تخوک علاقہ ئس مننگ آن ویتہ ہم اوٹی اسپتال، اسکول و ایلو بنداوی آسراتیک افس۔
میٹرنل مورٹیلٹی سروے نا ردئٹ پاکستان ئٹ خیر ئٹ مننگ وخت آ مرک آتا کچ کل آن زیات بلوچستان ئٹی ءِ ہراڑے خیر ئٹ مننگ وخت آ اسہ لکھ آن 298 لّمہ ساہ ایترہ۔
بلوچستان ئٹ “اسکلڈ برتھ اٹینڈنٹ” یعنی اسہ تربیت ہلوک جانجوڑی کارندہ ئسے نا ذریعت ئٹ خیر ئٹ مننگ نا کچ بیرہ 38 درسد ءِ۔ بے آزموندہ و ہیل کپروک جانجوڑی کارندہ غاک مرک آتا کچ ئٹ ودکی نا سوب جوڑ مننگ ءُ۔
یاتی مرے مرک آتا ارٹمیکو بھلا سوب بنداوی و ٹرشری ہیلتھ کیئر نا نظام ئٹ ساڑی نزوریک ءُ اندن مسٹمیکو بھلا سوب اسپتال آتیٹ بندغی تاغت نا کمبوتی ءِ۔
