بلوچستان نا دریابی شار گوادر ئٹی آل پارٹیز الائنس نا باسک و دوزواہ تا، میرین ڈرائیو آ اینو ہشتمیکو دے ہم برانز برجاء ءِ ہرانا سوب آن گوادر ئٹی ہڑدیئی زند بھاز زیمی مسنے۔
،برانزیک تیل و ایلو کاروبار کن ایران نا سیم ئے دوارہ ملنگ نا خواست کننگ ءُ ہرادے کیہی تو آن پاکستان بند کرینے۔
برانز ئٹی اوار رہشونک کنٹانی ہور بارڈر آ ٹوکن سسٹم آ نغد کاری کرسا اودے تجارت نا کسر ئٹ بھلا ہڑاند پاریر۔ اوفتا پاننگ اسک کہ دا گھامگیج آک ہند ئٹی بے روزگاری ئے گیش کننگ ءُ۔
برانزیک ٹوکن سسٹم ئے زوت ایسر و سیم آ بیدس توننگ آن تجارت ئے برجاء تخنگ نا خواست کریر۔
برانزی رہشونک گوادر ئٹی بنداوی آسراتی تا خراب حالیت آ سرپندی تسُر۔ اوفک پاریر کہ بجلی و کُننگ نا دیر ئنا کمبوتی، جہی مخلوق تون سخت نا انصافی ءِ۔
برانزیک پاریر کہ تلار چیک پوسٹ آ ہندی مخلوق نا تیل ئنا کاروباری آ اُلاخ آتہ توننگانے ہرانا سوب آن او کیہی ہفتہ آن کسر آ پھاسینگانو۔
او پاریر کہ دا وڑ ئنا رکھ خلنگ آن علاقہ ٹی معاشی و چاگڑدی حالیت آتِہ خراب کننگ ءُ، ہرانا سوب آن بندغ آتِہ مشکل آتون مون تروئی تمنگ ءِ۔
