تربت ئٹ خاہوت نا کنڈ آن کشنگ مروکا ریلی ٹی بھلو کچ ئسیٹ شاریک، لس مخلوق و بیگواہ کننگوک بندغ آتا خاہوت آک اوار مسر و استاد واحد کمبر نا آجوئی نا خواست کریر۔
بلوچستان نا ضلع کیچ ئنا بنجائی شار تربت ئٹ اینو اسہ ریلی ئس کشنگ مس، ہراٹی چُنا نیاڑی و ورنا تا بھلو کچ ئس اوار مس، ریلی نا مسخت کماش آ بلوچ آجوئی دوست راہشون، استاد واحد کمبر بلوچ نا وے آجو مننگ، اودے عدالت ئٹ وے ہتنگ و انصاف آ ساڑی ٹرائل تفننگ نا برخلاف اونا خاہوت نا پارہ غان برانز ریکارڈ کننگ اس۔
ریلی ٹی تربت نا جہی مخلوق، بیگواہ کننگوک بندغ آتا خاہوت آک، واحد کمبر نا خاہوت، و سیاسی تنظیم آتا راہشون و باسک آک اوار مسر۔ برانز کروک آک واحد کمبر تون اوار ایلو بیگواہ بندغ تا عکس آتے ارفیسر و زوراکی نا بیگواہی تا برخلاف نعرہ خلکر۔
استاد واحد کمبر بلوچ آجوئی نا تحریک ئٹی اسہ متحرک و شرفدارو ہستی ئس ءِ۔ اونا خاہوت و بلوچ آجوئی خواہوک تنظیم آتا دوبہ ءِ کہ اودے پاکستانی ایجنٹ آک ہمسایہ ڈیہہ ایران آن زور ئٹ بیگواہ کرسا پاکستان آ ہیسنو و داسا او پاکستانی لشکر نا قیذ ئٹی ءِ۔
تربت ریلی ٹی واحد کمبر بلوچ نا مسڑ، مہلب کمبر ہیت کرسا پارے کہ کنا باوہ بلوچ سیاسی جہد ئنا بشخ مسنے و ہر وخت بلوچ نا حق ئنا ہیت ئے کرینے۔ پاکستان اودے بیگواہ کرسا بے قانودی بندی کرینے۔
او خواست کرے کہ اودے مونی ہتنگ مرے و انصاف ئٹ ٹرائل نا
وارخواہی تننگ مرے۔
مہلب کمبر بندغی حق آتا تنظیم، خاصیکا ریڈ کراس آن خواست کرے کہ او دا ویل ئٹی دو شاغر (مداخلت کیر) و واحد کمبرئے سیاسی بندی ئسے نا وڑ آسراتی تننگ مرے۔
دا وختا برانزیک زوراکی نا بیگواہی تِہ ایسر کننگ و واحد کمبر نا زوت آجوئی نا خواست کریر و اوفتا پاننگ اسک کہ ریاست نا پارہ غان بیدادی و زور ئٹ آجوئی خواہوک ہستی تِہ بے توار کننگ حالت آتِہ پین خراب کرینے۔
ریلی ٹی ساڑی بیگواہ کننوک بندغ آتا خاہوت آک تینا بندغ آتا آجوئی نا خواست کریر و دوبہ خلکُر کہ عدالت و کمیشنک انصاف تننگ نا جاگہ غا ریاستی بیانیہ ئے مونی ہتنگ ءُ۔
برانزیک پاریر کہ بلوچستان ئٹی برجاء تحریک ئے توننگ کن ریاست نا پالیسیک دا ویل ئے پین زیات کننگ ءُ ورناک ریاستی بیدادی آن پد ہم سلاہ بند تنظیم آتیٹی اوار مننگ ءُ ہرانا سوب آن علاقہ ٹی حالیت پین خراب مننگ ءِ۔
برانزیک ایسر ئٹ پاریر کہ استاد واحد کمبر تون اوار ایلو بلوچ سیاسی و وے سیاسی زور بیگواہ کننگوک بندغ آتِہ پھاش کننگِہ و زوت آجو کننگِہ۔
