بلوچ نیشنل موومنٹ نا شنگ کروک اسہ درشان ئسیٹی پاننگانے کہ بندغی حق آتا جہانی دے آ جرمنی نا اِرا شار، کولن و کیمنٹس ئٹی برانز کننگا۔ برانز ئنا وخت بی این ایم نا باسک آک بینر و پلے کارڈ ہرفسہ تینا خواست و بلوچستان نا حالیت نا چائنداری تسُر۔
برانزیک بلوچستان ئٹی برجاء بندغی حق آتا لتاڑ آ روشنائی شاغار، ہراڑے پاکستانی ریاست منظم وڑ ئٹ زوراکی تا لڑ ئے برجاء تخانے۔
بی این ایم جرمنی چیپٹر نا صدر شر حسن ہیت کرسا پارے کہ بلوچستان نا شاری تِہ بنداوی بندغی حق آتیان پد بٹِسہ زوراکی تا گواچی کننگ مننگ ءِ۔ او پارے کہ پاکستانی اسٹیبلشمنٹ بلوچ راج ئنا منظم زنک کشی ٹی تُد ءِ۔
بی این ایم نا فنانس سیکریٹری امجد مراد جہانی مخلوق آ زور شاغا کہ اوفک بندغی حق آتا رکھ ئے کیر و بلوچ الس ئنا حالیت نا نوٹس ہلیر، ہرا پاکستان نا آمرانہ پالیسی تا رد ئٹ او سہنگ ءُ۔
بی این ایم نا باسک عزیز بلوچ (این آر ڈبلیو و رائن لینڈ فلز آن) بلوچستان ئٹی ریاستی زوراکی تا شابیت ئے درشان کرے۔ او پارے کہ پاکستانی لشکر زوراکی ئٹ بیگواہی، بیدس عدالت کھسفنگ و معصوم آ بندغ آتِہ بیگواہ کنننگ ئٹ تُد ءِ، ہرافتِہ دہشتگرد پارسا دروغ ئنا مونتس ئٹ خلنگک۔ اوفک دا گام ئے بندغی حق آتا برخلاف پاریر و جہانی مخلوق آن زوت دو شاغنگ (مداخلت) نا خواست کریر۔
بی این ایم نا باسک و شاعر، شئے جامی جہانی مخلوق آن بلوچستان نا ویل آتیا بے تواری ئے نغد کاری نا گواچی کرے۔ او پارے کہ جہانی تلہ غا اوفتا ویل آتِہ مونی دننگانے ولے داکان بیدس بلوچ راج ئنا حالیت آ پام تننگ افس۔
بی این ایم نا باسک آصف بلوچ بندغی حق آتا دے ئنا اہمیت ئے پارے کہ وختس جہان دا دے ئے اڈ تننگ ءِ، بلوچستان ئٹی خاہوت تینا بندغ آتا زوراکی ئٹ بیگواہی تا برخلاف انصاف نا خواست کرسا پارے کہ کسر تیا برانز کننگ ءُ۔
بی این ایم نا باسک بختاور زاہد پارے کہ بلوچستان ئٹی زوراکی اسہ اتفاق ئس اف بلکہ بلوچ آجوئی نا تحریک ئے توننگ کن منظم حکمت عملی نا بشخ ئس ءِ۔ او پارے کہ بلوچ راج ئنا حق خوداریت ئے مننگ مرے تاکہ امن و انصاف اڈ تننگِہ۔
بی این ایم نا باسک شلی زاکر خبڑدار کرے کہ اگہ دا زوراکی تِہ توننگ کن گام ہرفنگ متو گُڑا دانا ایسر بھاز خراب مرو۔ او جہانی مخلوق آن زوت دو شاغنگ (مداخلت) نا خواست کرے۔
بی این ایم نا باسک حمیدہ بلوچ بیگواہ کننگوک بندغ آتا خاہوت آتا گڑتی
تا بابت ئٹ سرپندی تس و پارے کہ زوراکی ئٹ بیگواہی نا تدینیک بلوچ راج ئنا صدمہ و خلیس نا سوب آک ءُ۔
بلوچ راج ئنا دوزواہ عابد حسین پارے کہ ریاستی زوراکی ئٹ بلوچ راج ئنا توارئے توننگ نا کوشست مننگ ءِ۔ او تینا ذاتی آزموندہ غا تِہ درشان کرے ہراٹی ریاستی کریک ڈاؤن ہم تُد اسک و دا جبر ئنا برخلاف جہانی مخلوق آن گام ہرفنگ نا خواست کرے۔
