بولان میڈیکل کالج و ایلو خواننگ جاہ تا ملٹرائیزیشن (فوج ہتنگ)، خوانندہ غا تِہ بیم ئنا گواچی کننگ و خواننگ جاہ تِہ ہاسٹل تتون اوار بند کننگ و خوانندہ غا تِہ زوراکی ئٹ بیگواہ کننگ نا بارث ئٹ بی ایم سی ٹی تدوکا دوانزدہ دے آن برانزی کیمپ برجاء ءِ۔
اینو تولوک برانز نا جاگہ غا بلوچستان نا خوانندہ گل آتا کنڈ آن اسہ سیمینار ئس اڈ تننگا۔
سیمنار ئٹی جتا خوانندہ گل، پارلیمانی پارٹی، سیاسی کارکن و نرینہ ئہ زالبول خوانندہ غاک بھلو کچ ئسیٹی اوار مسر۔ جتا بشخ ہرافتیٹ تران، پینل ڈسکشن و ٹیبلوک سیمینار نا بشخ اسر۔ سیمینار ئٹی بی وائی سی نا بنجائی آرگنائیزر ڈاکٹر ماہ رنگ بلوچ و پارلیمانی پارٹی تا ذمہ وار آتون اوار بلوچستان نا ایلو پارٹی تا ذمہ وارک مہمان اسر۔
سیمینار بلوچ راجی سوت ئٹ بناء کننگا۔ ہراکان گڈ بساک نا بنجائی وائس چیئرمین رفیق بلوچ بنائی تران کرے۔ سیمینار نا ارٹمیکو بشخ ئٹ بولان میڈیکل کالج ئے ہاسٹل تون اوار بند کننگ و ہاسٹل آ پولیس نا کوزہ و دا نا پد ندارہ (پس منظر) ٹی اسہ پینل ڈسکشن ئس اس ہراٹی بساک نا ہنکینی انفارمیشن سیکریٹری بیبگر بلوچ موڈریٹر نا وڑ تینا خذمت آتِہ تس و بی ایم سی نا خوانندہ غاک داٹی پینلسٹ اسر۔
سیمینار ئے مُستی درِسہ ایلو بشخ ئٹی ارٹمیکو پینل ڈسکشن مس ہرا نا سرحال “بلوچستان ئٹی تعلیمی ریفارم کن السی موبلائیزیشن ئٹی سیاسی ایکٹیوسٹ آتا کڑد” اس۔ ہرا نا موڈریٹر نا خذمت آتِہ بساک شال ہنکین نا صدر فہد بلوچ سر تس و داٹی بلوچستان ئٹی کاریم کروک سیاسی پارٹی تا سروک آک ہراٹی بلوچ یکجہتی کمیٹی نا پارہ غان ایڈوکیٹ سعدیہ بلوچ، بلوچ وویمن فورم نا کنڈ آن ڈاکٹر سمیعہ بلوچ، نیشنل ڈیموکریٹک پارٹی نا علی جان مقصود بلوچ و پشتون تحفظ موومنٹ نا زبیر شاہ آغاہ پینسلٹ اسر و داڑا شابیتی ئٹ تران کریر۔
مسٹمیکو پینل ڈسکشن ئٹی بلوچستان نا پارلیمانی پارٹی تا باسک آک پینلسٹ اسر ہراٹی بی ایس او نا عاطف بلوچ موڈریٹر نا خذمت آتِہ سر تس و پینلسٹ ئٹی نیشنل پارٹی نا ڈاکٹر اسحاق، بلوچستان نیشنل پارٹی نا غلام نبی مری، عوامی نیشنل پارٹی نا عبدالباری کاکڑ، و پشتونخواہ نیشنل عوامی پارٹی نا نصراللہ زیرے اس۔ ہرا دا رد ئٹ پارلیمنٹ نا کڑد تون اوار تینا مُستی نا پالیسی تیا ہیت تران کریر۔
دا پینل ڈسکشن آن گڈ بولان میڈیکل کالج نا خوانندہ غا تا پارہ غان ٹیبلو نشان تننگا۔
سیمینار نا ایسری پینل ڈسکشن ئٹی “بلوچستان نا خوانندہ تنظیم آتا کڑد” ئنا سرحال آ ہیت ئہ تران مس ہراٹی بساک شال زون ئنا جنرل سیکریٹری خداداد بلوچ موڈریٹر، بساک نا سیکریٹری جنرل اظہر بلوچ، بی ایس او نا بنجائی جنرل سیکریٹری صمند بلوچ، پی ایس ایف نا صوبائی پریزیڈنٹ طاہر شاہ کاکڑ و پی ایس او نا وارث افغان پینلسٹ اسر۔
سیمینار ئٹی بساک نا چیئرمین شبیر بلوچ گڈیکو تران ئٹ بولان میڈیکل کالج ئے بند کننگ و دا نا برخلاف بلوچستان نا خوانندہ تنظیم آتا کنڈ آن برجاء تولوک برانز آ تینا خیال آتا درشانی کرے۔
تیبہ سیمینار ئٹی غٹ پینسلٹ آک اسہ گڑا غا زور تسر کہ ادارہ غا تا ملٹرائیزیشن ئے بند کننگِہ و دمدستی بی ایم سی تون اوار ایلو خواننگ نا لڑ تِہ بحال کرسا ہاسٹل تِہ ملنگ مرے، ہلہ آنہہ گُڑا نن تینا برانز نا آئینی و جمہوری حق ئے کاریم ئٹ ہتون و دا سیمینار نا زریعت ئٹ نن اسہ وار ولدا زمہ دار آتِہ پانہ کہ او خوانندہ غا تا ڈیمانڈ آتِہ بنِر نہ تو نن سخت برانز کرون۔
