بلوچ یکجہتی کمیٹی نا کنڈ آن شنگ مروک بیان ئسیٹی پاننگانے کہ بندغی حق آتا جہانی دے آ دنیا ہمو بنداوی اصول آتیا جشن کیک ہرا ننے اسہ جہانی برادری ئسے نا دروشم ئٹ ہمکوپہ کیرہ: شرف، انصاف، و بھیم آن آزات زند ئنا حق۔ ولے بلوچستان ئٹ دا اصول آک دہک آتیان جلہو تا پلویڑ ئٹی ءُ۔ بلوچ الس، ہرا اسہ دود و ربیدئی و دیہاڑی مڈی تیان ہستمند ءُ ڈغار ئسے نا خواجہ ءُ، زنک ایسری نا تصور مفروک وخت ئسیتون مون تننگ ءُ۔
بیان ئٹ پاننگا کہ زوراکی نا بیگواہیک، جشوک جونک، بیدس عدالت خونک، و چرجوئی ئٹ ریاستی بیدادیک بلوچستان ئٹ زند ئنا اسہ تہارمہ ءُ گواچن ئس جوڑ مسنو۔ ہفت دہک آتیان زیات ئنا دا بھیم بش کروک وخت ئٹ ریاست نا بلوچ آتِہ تاغت نا ذریعت ئٹ چپ کرفنگ نا پالیسی ٹی چرجوئی ئٹ ودکی مسنے، خاص وڑ ئٹ زوراکی نا بیگواہی و بیدس عدالت خون تا تدینی تیٹ۔ بیرہ نومبر نا توہ ئٹ، 88 بلوچ زوراکی ئٹ اودیم کننگانے و 8 بندغ ئے بیدس عدالت کھسفنگانے۔
ودیک پاننگا کہ زوراکی نا بیگواہی تا کل آتیان زیات تدینی مکران نا علاقہ ئٹ ریکارڈ کننگار، ہراڑے 40 کیس مونا بسر، اندن 30 کیس ساراوان نا علاقہ ئٹ رپورٹ مسر۔ ایلو علاقہ تیٹ ہم اندا حالیت نا تدینیک مونا بسر، ولے ریاست نا پارہ غان خلوک پابندی تا سوب آن زوراکی نا بیگواہی تا گواچن کچ سماء تمنگ کتنے۔ تیبہ بلوچستان ئٹ برجاء بھلو کچ ئسے آ فوجی کارروائیک دا بندغی حق آتا لتاڑنگ و بلوچ راج ئنا برخلاف برجاء زنک ایسری نا اسہ پین بھیم بش کروک یات گار ئس ءِ۔
اندن پاننگا کہ دا ظلم آتیان پد ہم بلوچ الس تینا بنداوی بندغی حق آتا دا لتاڑ آتا برخلاف مزاحمت برجاء تخانے۔ دا وخت بلوچستان نا جتا شار تیٹ مُسہ تولوک برانز برجاء ءُ۔
ریاست و اونا قانود نافذ کروکا ادارہ غا تا گھامک سوگوی ئٹ بلوچ الس ئے اوفتا جہانی بنداوی بندغی حق آتیان پد بٹینو۔ بندغی حق آتا جہانی منشور، جنیوا کنونشن، و ایلو جہانی معاہدہ غا تیٹ بیان کروک حق آک بلوچ راج ئکن ساڑی افس۔
بیان ئٹ ودیک پاننگا کہ اندا سوب آن، نن داڑے سلوک اُن، ریاستی ظلم آتا برخلاف مزاحمت کرسہ و تینا بنداوی بندغی حق آتا ہر منکن ذریعت ئے کاریم ئٹ ہتِسہ رکھ ئے کننگ اُن۔ اندا رد ئٹ، 10 دسمبر آ بی وائی سی بلوچستان نا جتا علاقہ غا تیٹ پرامن برانز آتا لڑ ئے بناء کرو تانکہ جہان ئے یات ترفنگہ کہ بندغی حق آتا دے ئنا جشن ہمو وخت بے معنہ مریک ہراتم دا منشور نا اصول آتِہ برجاء تخنگ مف۔
دا نما ذمہ واری ءِ کہ ننا رکھ ءِ کبو و ننتون ہمکوپئی نا درشانی کبو۔
چپ مفبو، وختس کہ اسہ راج ئس ایسری نا کسر آ سلوک ءِ۔
