بلوچ نیشنل موومنٹ نا فارن (ڈنی) سیکریٹری فہیم بلوچ بندغی حق آتا دے آ برطانیہ نا پارلیمنٹ ئٹ ہیت کرے۔
مجلس نا میزبانی ئے بلوچ ہیومن رائٹس کونسل نا پارہ غان خواجہ سوجن جوزف ایم پی کرے۔
تینا تران ئٹی فہیم بلوچ بلوچستان نا مخلوق نا ساڑی آ حالیت آ ہیت کرے۔
او پارے کہ بلوچ نیشنل موومنٹ نہ بیرہ آزادی کن جہد کننگ ءِ بلکہ بلوچستان نا مخلوق نا توار مننگ کن جہد کننگ ءِ۔ او سخت انگا حالیت نا گواچی ءُ۔ بلوچستان قدرتی مڈی آن پُر ءِ۔ واہم ویل آتا پلویڑ ئٹی ءِ۔ ہزار آ نرینہ، زالبول و چُناک پاکستانی لشکر نا دُو آن بیگواہ کننگانو ہرافتا خاہوت آتِہ ڈُک ئٹ یلہ ترِسہ، اوفتِہ اوفتا بیگواہ غا بندغ آتا ڈس ئہ پت آن بے خبر تخنگانے۔
اونا پاننگ اس کہ داسا ہنوکا ہفتہ ٹی کنے ذاکر مجید نا کیس یات بس ہرادے پانزدہ سال مُست زوراکی ئٹ بیگواہ کننگاسس۔ اونا لُمّہ تینا مار ئنا جنسار ئے ارفِسہ جلسہ تیٹی ہیت کرِسہ پارے کہ “دا کنا گُڈی وصیت ءِ۔ اگہ ای کھسکُٹ تو ای نمے آن خواست کیوہ کہ دا جنسار ئے زندہ تخرے۔” دا اسہ ڈُکھیائی ءُ لُمّہ ئسے نا چہرہ ءِ۔
اونا پاننگ اس کہ بلوچ نیشنل موومنٹ نا اسہ سینیئر راہشون ڈاکٹر دین جان بلوچ نا ویل آ غور کین ہرادے پانزدہ سال مُست بیگواہ کننگاسس۔ اونا زائیفہ پائیک کہ کنے سما اف ای تینے برامیئو نیاڑیس پاو یا جنوزان ئس۔ اونا مَسِڑ سمی دین بلوچ انصاف کن برانز کرِسہ روڈ آتیا پیشتمک۔
فہیم بلوچ پارے کہ مُسہ دے مُست ضلع خضدار آن ہشت سال مُست بیگواہ کننگوک بندغ ئسے نا سڑوک ہڈ آک خننگار۔ بیرہ اونا ہڈ آک چائنگ مسر۔ اونا باوہ است ئنا ہُشنگ ئٹ پارے کہ “کم آن کم نن داسہ جارات ئٹ خاچنگ کرون، دا چائنگ آن گڈ کہ ننا مار ئے کھسفِسہ کھڈ کننگانے۔ اونا لُمّہ ہر نن دا خلیس آن ہوغوف کہ اوڑا بیدادی کننگ مرور۔”
او پارے کہ دا بلوچستان نا بے کچ دڑدی آ کسہ آتیان منہ کسہ ءُ۔ دا وڑ ئنا ہزار آ کیس آک اریر۔ سوج دادے کہ دا انتئے بیگواہ کننگ مریرہ۔ ذاکر مجید ئے اندا سوب آن بیگواہ کننگا کہ او بلوچستان نا آجوئی نا ہیت کریکہ۔ ڈاکٹر دین جان ئے ہم اندا سوب آن بیگواہ کننگانے۔
دا ویل آتا ماس بلوچستان آ زوراکی نا کوزہ ءِ۔ بلوچ بیرہ بنداوی حق، دیر، پُہریا یا سوئی آن پیشتموکا گیس کن جہد کننگ اف بلکہ او بلوچستان نا آجوئی کن جہد کننگ ءِ۔
اونا پاننگ اس کہ نن خواجہ جوزف کون آ لیڈر آتیان بلوچ الس کن توار بڑز کننگ نا اومیت تخنہ، ہرا تینا آجوئی و بنداوی حق آتیکن جہد کننگ ءُ۔
