بلوچ نیشنل موومنٹ نا رہشون رحیم بلوچ ایڈوکیٹ چاگڑدی حوالکاری تلہ ایکس آ تینا اسہ پوسٹ ئسیٹ جہانی برادری خاص کر بندغی حق آتا تنظیم آتیان خواست کرے کہ او پاکستانی لشکر نا دو آن زوراکی ئٹ بیگواہی نا گواچی کننگوک بلوچ کماش راہشون استاد واحد کمبر و ایلوتا ہزار آ بلوچ آتیکن توار بڑز کیر۔
او پارے کہ واحد کمبر بلوچ نا خاہوت وسنگت آتے دائسکان اونا جاگہ،سلامتی و اوڑا خلنگ مروکا الزام تا بابت ئٹ پاننگ افس۔
رحیم بلوچ نا پاننگ اسک کہ واحد کمبر بلوچ ئے پاکستان نا انٹیلی جنس کارندہ غاک 19 جولائی 2024 آ کرمان آن برمتہ کریر، اوڑے او علاج کن ہناسس۔واحد کمبر بلوچ، بلوچ راجی آزادی نا تحریک ئٹ اسہ اہم شخصیت ئسے۔
او پارے کہ بلوچ راجی کاز آجوئی اسہ منصفانہ و ناجائز مسخت ئسے۔ جہانی قانود ئٹ آزادی کل راج آ تیکن اسہ مننگ مروکو حق ئسے۔
اونا پاننگ اسک کہ پاکستان نا بلوچ آزادی دوست قیادت و باسک آتے زوراکی ئٹ بیگواہی و بیدس عدالت آن خلنگ نا پالیسی بندغی حق آتا برخلافءِ۔
زوراکی ئٹ بیگواہی انسانیت نا برخلاف جرم ئسے و پاکستان کیہی کرن آ تیان بلوچ راج ئنا برخلاف دُنو میار کننگءِ۔
رحیم بلوچ ایسر ئٹ پارے کہ جہانی برادری خاص کر بندغی حق آتا تنظیم آتے خواہک کہ او واحد قمبر و ایلو بیگواہ انگا ہزار انگا بلوچ آتیکن توار بڑز کیر ہرا پاکستانی لشکر،انٹیلی جنس ایجنسی و ایلو سیکیورٹی ادارہ تا دو آن بیگواہ مسنو۔
