وائس فار بلوچ مسنگ پرسنز نا بھلنی ٹی زوراکی ئٹ بیگواہی تا برخلاف گدان ئے اینو 5654 دے مس، نوشکے آن بروکا سیاسی و چاگڑدی جہدکار فیض امیر بلوچ، نزیر احمد بلوچ و لیاقت بلوچ بسّر اواری نا درشانی کریر۔
وی بی ایم پی نا وائس چیئرمین ماما قدیر بلوچ تران کرسہ پارے کہ ‘اقوام متحدہ’ زوراکی نا بیگواہی تا برخلاف بھازا قرارداد آتہ منّانے، ہرافتا حساب آ زور ئنا بیگواہی ہر وڑئٹ بندغی نا شرف ئکن بھلو ڈوہ ئس ءِ۔ دا اقوام متحدہ نا چارٹر و بندغی حق آتا پھاش لتاڑ ءِ۔
ماما قدیر بلوچ پارے کہ پاکستان دنیا ئے ریفسہ بلوچ نا زنک ایسری ئے کننگ ئٹی ءِ۔ پاکستانی ایجنسی تا کارندہ غاک ہڑدے بلوچ ورناتہ زورئٹ بیگواہ کیرہ، اوفتہ بندی کرسہ بیدادی کیرہ و پدا اوفتا جون تہ خسّرہ۔
او پارے کہ 2001 آن دائسکان ہزار آ بلوچ آتہ اُراتان، بازار تان، کسر تیا گاڈی تان یا خواننگ جاہ تان بیگواہ کننگانے، ہرافتیٹ نیاڑی، چُنا و کماش ہم ارے۔
او اقوام متحدہ و جہانی ادارہ غا تا تنقید کرسہ پارے کہ او پاکستان نا برخلاف گام ہفّنگ ئٹی افس بیرہ افسوس نا کچ اسکان درشان شنگ کیرہ۔ چھانڑدہ سال آن برجاء غا بین برانزی گدان نا توار ئے اقوام متحدہ نا وےبِننگ تینٹ بندغی حق آتا چارٹر آن برخلاف ءِ۔
ماما قدیر بلوچ مُستی پارے کہ اقوام متحدہ تینٹ بیگواہ تا خاہوت و بلوچ راج ئنا راست انگا زمہ وارتون ملّنگ نا جہہ آ پاکستانی کارندہ غا تا رداِنگا حوال تیا باور کننگ ئٹی ءِ۔ اگہ اقوام متحدہ داڑا گام ہفتو تو پاکستان نا بندغی حق آتا لتاڑ پین زیات مرو، ہراڑان بھلو بندغی ویل ئس ودی مننگ کیک۔ دا ویل ئنا مچا زمہ وار اقوام متحدہ و بندغی حق آتا جہانی ادارہ غاک مرور۔
