بلوچستان نا ضلع کیچ ئٹ لشکر کشی برجاء ءِ اندن لشکر کشی نا وخت آ پاکستانی لشکر اِرا بندغ دزگیر کننگ آن گڈ بیگواہ کرینے۔
شابیتی حوال تا ردئٹ کیچ ئنا علاقہ زامران ئٹی گیشتردان، نوانو، ھان کلگ تون اوار ہبب ئہ کھیب ئنا علاقہ غا تیٹ لشکر کشی برجاء ءِ۔
جہی حوال تروکا تا ردئٹ لشکر کشی نا وخت آ پاکستانی لشکر گیشتردان آن اِرا بندغ دزگیر کننگ آن گڈ بیگواہ کرینے۔
بیگواہ مروک آتیٹ ملا سلام نا مار شعیب و فتح محمد نا مار پزیر اوار ءُ۔
پن کروک بندغ آتِہ پاکستانی لشکر ہموتم دزگیر کرے ہراتم او تومکا تینا میڷ تِہ ہُننگ کن ہناسر۔
حوال تروکا تا پاننگ ءِ کہ علاقہ ئٹ بھلو کچ ئسیٹی لشکری کارندہ غاک ساڑی ءُ اندن فوجی تا ہن ئہ بر ہم برجاء ءِ۔
